Renualt компанияси Roodell дилерлик тармоғи билан ҳамкорликда Ўзбекистон ҳудудида автомобиль ишлаб чиқариш ва сотишни йўлга қўйишни бошламоқда. Бу ҳақда компания матбуот хизматига таяниб, Spot хабар берди.
Шунингдек, бренд мамлакатда автомобилларни йиғиш ва дилерлик тармоғини ривожлантириш бўйича узоқ муддатли лойиҳани амалга ошириш ниятида.
«Ўзбекистон — Марказий Осиё минтақасида жадал ўсиб бораётган бозор, бу ерда янги автомобиллар бўлган қизиқиш тобора ортиб бормоқда. Ишончимиз комилки, ўзбекистонлик мижозлар Renault автомобилларининг дизайни, замонавий технологиялар ва юқори даражадаги қулайликни муносиб баҳолайди», — дейди Renault’нинг Россия ва МДҲ давлатлари бўйича бош директори Ян Птачек.
Renault Ўзбекистон бозорида аввалроқ Россия ва МДҲнинг бошқа давлатларида сотувга чиққан моделларини тақдим этади.
Илк автомобиллар 2021 йилнинг кузидан сотувга чиқади — булар Arkana купе-кроссовери, шаҳар шароитига мўлжалланган Kaptur кроссовери, шунингдек, янги авлод Duster йўлтанламаси.
Нархлар
Roodell’нинг «Gazeta.uz»га маълум қилишича, Ўзбекистондаги Renault моделларининг нархлари қуйидагича бўлади:
• Arkana — 230 879 300 сўмдан бошланади;• Duster — 225 108 500 сўмдан бошланади;• Kaptur — 221 115 600 сўмдан бошланади.
Россияда Arkana нархи — 1,3 миллион рублдан (18,3 минг доллар), Kaptur — 1,22 миллион рублдан (17,1 минг доллар), Duster — 1,01 миллион рублдан (14,3 минг доллар) бошланади.
Renualt’нинг Ўзбекистондаги дилерлик тармоғини ривожлантириш босқичма-босқич, бозор талабларига мос равишда амалга оширилади. Биринчи босқичда Renault савдолари ва сервиси Тошкентдаги иккита дилерлик маркази орқали амалга оширилади.
Эслатиб ўтамиз, Ўзбекистонда Lada ва Renault автомобилларини йиғишни йўлга қўйиш режалаштирилаётгани 2020 йилнинг охирларида маълум бўлганди. Бу ҳақда 2021—2023 йилларга мўлжалланган Инвестиция дастури тасдиқланган Президент қарорида келтирилган. 2021 йилда Renault—«АвтоВАЗ» автомобиль заводи қурилиши ва ишга туширилиши кўзда тутилганди.
Изоҳ (0)