Энергетика вазирлиги штаби томонидан Намангандаги «Тўрақўрғон асфальт саноат» МЧЖга қарашли асфальт ишлаб чиқариш корхонасининг табиий газдан фойдаланиш ҳолати текширилди. Бу ҳақда вазирлик матбуот хизмати хабар берди.
Текширув жараёнида корхона томонидан табиий газдан фойдаланиш учун газ таъминоти ташкилоти билан табиий газ етказиб бериш шартномаси тузилмагани ва ушбу истеъмолчи «Ҳудудгаз Наманган» газ таъминоти филиалининг FOSSA дастурида мавжуд эмаслиги маълум бўлган.
Олиб борилган ҳисоб-китобларга кўра, мазкур корхона томонидан 97 минг 412 куб метр табиий газдан ноқонуний равишда фойдаланилган. Бунинг натижасида газ таъминоти корхонасига етказилган зарар миқдори 97 миллион 412 минг сўмни ташкил этган.
Таъкидланишича, ушбу ҳажмдаги табиий газ қарийб 10 мингта хонадоннинг 1 кунлик истеъмолини ташкил қилади. Ҳолат юзасидан тўпланган ҳужжатлар Наманган вилояти прокуратурасига тақдим этилган.
Аввалроқ Энергетика вазирлиги Ўзбекистонда 2021 йил бошидан буён қарийб 78 млрд сўмлик газ ўғирланганини маълум қилганди.
Изоҳ (0)