Хитой шимолидаги Шаньси провинциясида бир ҳафтадан буён тинмаётган кучли ёмғир кенг кўламли сув тошқинларини келтириб чиқарди. Оқибатда минтақадаги 1 миллион 760 минг кишини эвакуация қилишга тўғри келди, деб ёзади BBC Хитой метеорологик хизматига таяниб.
Таъкидланишича, табиий офат провинциянинг 70 дан ортиқ туман ва шаҳарларидаги уйларни вайрон қилган ва кўчкиларга сабаб бўлган. Шу билан бирга, давом этаётган ёмғирлар қидирув-қутқарув ишларини мураккаблаштирмоқда.
Бу ҳолатнинг яна бир аянчли томони шундаки, провинцияда сув тошқини хавфи остида қолган кўплаб тарихий обидалар мавжуд.
Ҳозирча табиий офат ҳудудида содир бўлган кўчки натижасида ҳалок бўлган тўрт нафар полициячи ҳақида маълум қилинган. Бошқа қурбонлар ҳақида маълумот йўқ. Дастлабки маълумотларга кўра, тошқинлар оқибатида маҳаллий аҳолининг 17 минг уйи вайрон бўлган. Прогнозларга кўра, ҳозирги ёмон об-ҳаво уч ой олдин Хэнань провинциясида 300 дан ортиқ одамнинг ўлимига олиб келган тошқинлардан ҳам ёмонроқ бўлади.
Ўтган ҳафта Хитой шимолида кучли ёмғир ёғишни бошлаган. Бу вақт мобайнида Шаньси провинцияси пойтахти Тайюанда ўртача ёғингарчилик минтақада 1981 йилдан 2010 йилгача қайд этилган октябрь ойидаги ўртача ёғингарчиликдан 7 баравар юқори бўлди.
Эслатиб ўтамиз, Лондонда 6 октябрга ўтар кечаси кучли ёмғир ёғиб, оқибатда сув тошқини юз берган ва бир нечта метро линиялари ёпилганди. Шунингдек, ўтган ҳафта бошида Италияда об-ҳаво кескин ёмонлашиб, кучли ёмғир, момақалдироқ ва қаттиқ шамол бошланган. Мамлакатнинг Фуқаролик мудофаа хизмати қарорига биноан, учта шимолий вилоят — Лигурия, Ломбардия ва Пьемонтнинг бир қатор туманларида метеорологик хавфнинг «қизил» (энг ёмон) даражаси эълон қилинди.
Аввалроқ Уммон ва Эронга кучли «Шоҳин» тропик циклони урилиб, 13 киши табиий офат қурбонига айлангани ҳақида хабар берилганди. Қайд этилишича, Уммоннинг шимолий қирғоғида кенг кўламли сув тошқини содир бўлган. Кучли ёмғир ёғиб, шамол тезлиги соатига 150 километргача етган.
Изоҳ (0)