Каттақўрғондаги хонадонда газ портлагани юзасидан жиноят иши қўзғатилди

8 октябрь куни Самарқанд вилояти Каттақўрғон туманидаги уйларнинг бирида ҳаво-газ аралашмаси портлаши содир бўлган эди. Бош прокуратура ахборот хизмати раҳбари Ҳаёт Шамсутдиновнинг маълум қилишича, ҳолат юзасидан жиноят иши қўзғатилган.

«Каттақўрғон шаҳридаги хонадонлардан бирида газ портлаб, икки киши тан жароҳати олганлиги ҳолати юзасидан Жиноят кодексининг 259-моддаси (ёнғин хавфсизлиги қоидаларини бузиш) билан жиноят иши қўзғатилган. Каттақўрғон тумани ИИБ ҳузуридаги ТБ томонидан тергов ҳаракатлари олиб борилмоқда», — дейилади хабарда.

Ҳолатни ўрганган Zarnews нашрининг маълум қилишича, портлаш юзага келган хонадон жойлашган кўчада яшовчилар бир йилдан бери мазкур эҳтимолий ҳолат ҳақида расмий идораларга мурожаат қилиб, ёрдам сўраб келган.

Маълум қилинишича, Каттақўрғон шаҳри Тошкент кўчаси 145-уйдаги хонада газ қувурлари бўлмаган. Хонадон девори ортида эса автомобилларга ёнилғи қуйиш шохобчаларига тегишли 4 та йирик (6 килограммлик) ҳамда битта кичик, аҳоли учун (1 килограммлик) газ қувури ўтган. Аҳоли фикрича, ана шу йирик қувурлар носоз ҳолга келиб, ундан сизиб чиққан газ кўнгилсиз ҳодисага сабаб бўлган.

Хонадон соҳиби Қаҳрамон Султоновнинг айтишича, портлаш содир бўлган куни хонадонга қўшни Қозоғистондан меҳмон келиб, улар тонггача суҳбатлашиб ўтирган. Тонгги соат 04:15 лар атрофида портлаш юз берганида ҳам ҳамма уйғоқ бўлиб, дарҳол ташқарига чиққан. Шунга қарамай, икки киши куйиш тан жароҳатини олган. Жумладан, қозоғистонлик меҳмон жиддий куйиш тан жароҳати олиб шифохонага ётқизилган. Портлашдан уй эгасининг акаси ҳам жароҳатланган.

Таъкидланишича, ушбу ҳудудда яшовчи аҳоли портлаш эҳтимоли ҳақида бир йилдан буён вилоят ва республика даражасидаги қатор идораларга мурожаат қилиб келган. Хусусан, республика прокуратурасига йўлланган мурожаат хатида, жумладан, шундай дейилади:

Каттақўрғон шаҳар «Кўҳнадам» маҳалласи, Тошкент кўчасида яшовчи аҳоли, жумладан, бизнинг уй-жойимиз, фарзандларимиз ва ўзимиз бир неча йилдан буён портлаш хавфи остида қолмоқдамиз. Биз бу ҳақда бир неча бор Каттақўрғон шаҳар ҳокимлигига, прокуратурага мурожаат қилдик. Бизнинг хавфсизлигимиз учун юқори босимли газ тармоғини кўчамиздан олиб ташланмади.

Ҳудудда бир қатор автомобилларга газ қуйиш шохобчалари қурилгач, аҳоли хонадонлари орасидан ҳаётимиз учун хавфли бўлган юқори босимли газ тармоқлари ўтказилди. Натижада 2015 йилда маҳалламиздаги юқори босимли газ қувурларидан Тошкент кўчасида жойлашган 147-уйнинг ертўласига сизиб кирган газ таъсирида кучли портлаш рўй берди. Шундан кейин ҳам қувурлар бошқа жойга кўчирилмади. Бу юқори босимли қувурлар кўчирилмаса кўплаб хонадонлар, одамлар, болалар жабр кўриши мумкин...

Тошкент кўчасидаги хавфсизлик ва техника қоидаларига амал қилмасдан ўтказилган қувурларни бошқа жойдан ўтказишда ёрдам беришингизни сўраймиз.

«Каттақўрғоншахаргаз» газ таъминоти бўлими бошлиғи Шавкат Абдусаломов ҳолатга муносабат билдирган: «Ҳолатни ўрганиш учун қувурларни очиб кўрдик. Бу ердан битта Каттақўрғон шаҳри аҳолисига борадиган газ кичик газ қувури ва тўртта Каттақўрғон туманидан газ оладиган, бир неча АЁҚШларга борадиган йирик газ қувурлари бор. Аҳоли учун борадиган кичик қувурларда носозлик йўқлигини кўрдик. Энди йирик қувурларни кўздан кечиряпмиз, кейин ҳолатни аниқлаймиз».

Нашрнинг қайд этишича, қувурлар тўлиқ қазилгач, АЁҚШларга тортилган йирик газ қувурларидан бири ёрилиб, газ шу орқали тарқагани маълум бўлган. Буни аҳоли ва газтаъминот корхонаси вакиллари тасдиқлаган.

Аввалроқ Чилонзордаги кўп қаватли уйларнинг бирида газ портлагани, Сергелидаги омборхоналардан бирида газ портлаши оқибатида бир киши ҳалок бўлгани тўғрисида хабар берилганди.