Navoiy shahrida joylashgan gaz quyish shoxobchasida portlash sodir bo‘lib, yong‘in kelib chiqdi, deya xabar bermoqda Favqulodda vaziyatlar vazirligi matbuot xizmati.
Kadr: Videodan skrinshot
Ma’lum qilinishicha, 12-avgust kuni soat 19:16 da Navoiy viloyati, Navoiy shahar, Me’morlar ko‘chasida joylashgan, propan gaz quyish shoxobchasida yong‘in sodir bo‘layotgani to‘g‘risida Favqulodda vaziyatlar boshqarmasiga xabar kelib tushgan.
Ushbu holat bo‘yicha yong‘in joyiga 9 ta yong‘in-qutqaruv ekipaji jalb etilgan. Birinchi yong‘in-qutqaruv ekipaji soat 19:18 da voqea joyiga yetib borib, soat 19:45 da yong‘in qurshab olingan va soat 19:53 da yong‘in batamom o‘chirilgan.
Yong‘in kelib chiqish sababi “ZIL-130” rusumli propan yoqilg‘i tashish avtomobili o‘zidagi suyultirilgan gazni to‘kish vaqtida chaqnash sodir bo‘lgan, oqibatda yuk avtomobiliga foydalanish uchun o‘rnatilgan gaz balloni yorilishi sabab yong‘in kelib chiqqan.
“ZIL-130” rusumli suyultirilgan yoqilg‘i tashish avtomobiliga o‘rnatilgan sig‘imga zarar yetmagan.
Hodisa oqibatida shoxobcha yaqinidan harakatlanib ketayotgan “Moskvich-412” rusumli avtomashina haydovchisi va 3 nafar yo‘lovchisi turli darajada kuyish tan jarohatini olgan, halok bo‘lganlar yo‘q.
Bundan avval Sergelidagi omborxonalardan birida gaz portlashi oqibatida bir kishi halok bo‘lgani, Samarqandda yoqilg‘i quyish shoxobchasidagi portlash oqibatida bir kishi halok bo‘lgani hamda Namangandagi xonadon oshxonasida gaz portlashi oqibatida 12 yoshli bola halok bo‘lgani haqida xabar berilgandi.
