Намангандаги яшик тайёрлаш билан шуғулланадиган қишлоқ. Унинг аҳолиси маҳсулотларини ҳатто хорижга ҳам юборади (фото ва видео)

Гуртепа Наманган вилоятининг Мингбулоқ туманидаги энг қадимий ва энг катта қишлоқлардан ҳисобланади. Бу ҳақда «Дарё» мухбири Азизбек Абдувалиев ҳикоя қилмоқда.

Тарихий манбаларда қайд этилишича, ХХ аср бошларида қишлоқ гуркираб ривожланган, «минг уйли» кичикроқ шаҳарча даражасига етган. Аҳолиси эса савдогарлик ва ҳунармандчилик, хусусан, бўз тўқиш билан шуғулланган.

Кейинчалик Гуртепа ёғоч қутилар — яшик ясашга ихтисослашди. Ҳисоб-китобларга кўра, бугунги кунда қишлоқда 200 га яқин катта-кичик корхона бўлиб, уларда 2,5 мингдан ортиқ одам яшик тайёрлаш билан банд. Бу қишлоқ аҳолисининг чорак қисми дегани.

— 10 йилдан бери шу иш билан оилавий шуғулланамиз, — дейди гуртепалик Каримжон Абдураҳимов. — Қишлоқдаги энг катта корхоналардан бири бизга тегишли. Кунига тахминан 3 мингта яшик тайёрланади. Уларни Ўзбекистон бўйлаб тарқатамиз, асосий харидорлар Олтиариқ ва Қўқондан. Ҳозир яқин хориж — Тожикистон, Қирғизистон ва Қозоғистонга ҳам юборяпмиз. Яшик мева сақлаш учун ишлатилади. Масалан, ҳозирги куз мавсумида узум ва хурмо солиш учун олишяпти. Яшик учун Калифорния тераги ёғочидан фойдаланамиз. Яшиги оппоқ, чиройли чиқади, станокда ҳам қийнамайди.

Каримжоннинг айтишича, ўлчами ва кетадиган хом ашёга қараб яшикларнинг нархлари фарқланади. Энг арзони помидор учун мўлжаллангани — 3-4 минг сўм, энг қиммати эса олманики — 20 минг сўмгача бориши мумкин. Узум яшиги 5,5 минг, хурмоники эса 6,5 минг сўм.

— Гуртепада ҳар икки уйнинг бирида ёғочга ишлов берадиган станок бўлса керак. Бизнинг оилада уч ака-ука шу иш билан шуғулланамиз. Кам бўлмаяпмиз: ҳовли-жойлар қилдик, дўкон қурдик, машиналар олдик. Эндиги ниятимиз ота-онамизни ҳажга жўнатиш, — дейди Каримжон.

Корхонада 20 нафардан ортиқ одам ишлайди. Эркаклар ёғочни қайта ишлаш билан банд бўлса, аёллар яшикка мих қоқиш ва тайёр ҳолатга келтириш билан овора.

— Кунига ўртача 200 та яшик тайёрлайман. Ҳар бири учун 400 сўмдан беришади. Шунда бир кунда 80 минг сўм ишлаб топиш мумкин. Яшикка мих қоқиш осон иш эмас, бошида қўлларимга мих кириб кетган, болғани уриб олиб, кўкартириб юрган пайтларим бўлган. Кейинчалик кўникиб, тажрибам ошди, ҳозир ҳатто кўзимни юмиб ҳам тайёрлай олсам керак. Уйда тикувчилик билан шуғулланаман, келгусида тиббиёт коллежига ўқишга кириб, ҳамшира бўлиш ниятим бор, — дейди корхона ишчиси Маҳлиё Абдумуталова.

Маҳлиёнинг «ҳозир кўзимни юмиб ҳам тайёрлай олсам керак» деганини дастлаб муболағага йўйдик, лекин 18 яшар қаҳрамонимиз битта яшикни михлаб қўйиши учун 20 сония етарли бўлди. Бизга эса бунинг учун 2 дақиқага яқин вақт кетди.

Гуртепанинг салоҳиятидан самарали фойдаланиш учун яшикчиликка ихтисослашган кичик саноат зонаси ташкил этишга қарор қилинди.

Қишлоқнинг «Тегирмонбоши» маҳалласида бунинг учун 8 гектар ер майдони ажратилди ва қурилиш ишлари бошлаб юборилди.

— Кичик саноат зонасида 64 та лойиҳа амалга оширилиши ва 50 миллиард сўмга яқин маблағ йўналтирилиши режалаштирилган. Бунинг натижасида қишлоқдаги бир неча юз одамнинг бандлиги таъминланади. Бизнинг сектор ҳудудида жойлашган ва Ўзбекистонда ягона бўлган мазкур кичик саноат зонаси келгуси йили Наврўз байрами арафасида фойдаланишга топширилади, — дейди Мингбулоқ туман солиқ инспекцияси бўлим бошлиғи Дониёр Қулиев.

Ўзбекнинг тўй-тўноқлари, байрамлари кўп. Уларга яшикларда мева-чева харид қилиш одат тусига кирган. Энди билиб олдингиз, бу яшиклар Наманганнинг Гуртепасида тайёрланган бўлади...