АҚШнинг Ўзбекистондаги элчихонаси аёллар ва қизлар учун ўз-ўзини ҳимоя қилиш бўйича бепул машғулотларни очмоқда. Бу ҳақда элчихона матбуот хизмати хабар берди. АҚШ халқаро спорт алмашинуви дастурининг битирувчилари профессионал инструкторлар билан фудокан каратэ-до бўйича курсларни ўтказади.
Маълум қилинишича, машғулотлар 2021 йил ноябрь ойидан бошлаб Makro супермаркетлар тармоғи томонидан ёрдам сифатида таъминланадиган замонавий спорт залида уч ой давомида ўтказилади. Машғулотларнинг аниқ бошланиш санаси бўйича маълумот танлаб олинган барча иштирокчиларга қўшимча равишда етказилади. Иккита ёш оралиғи бўйича тузиладиган гуруҳларнинг ҳар биридаги иштирокчилар сони 30 кишидан ошмайди.
- А гуруҳи: 13 ёшдан 18 ёшгача бўлган қизлар – душанба, чоршанба ва жума соат 15:00 дан 16:00 гача;
- Б гуруҳи: 18 ёшдан ошган аёллар – душанба, чоршанба ва жума соат 21:00 дан 22:00 гача.
Иштирокчилар ўз-ўзини ҳимоя қилиш кўникмаларидан ташқари, низоларни ҳал қилиш, очиқ мулоқот ва стрессни бошқариш усулларини ўрганади.
Машғулотлар жисмоний тайёргарлик даражасидан ёки олдинги машғулот тажрибасидан қатъий назар, 13 ёшдан ошган қизлар ва аёллар учун мўлжалланган.
Ўзини ҳимоя қилиш бўйича машғулотларнинг биринчи босқичида қатнашиш учун ушбу ҳавола орқали рўйхатдан ўтиш лозим. ўтиши керак. Аризаларни қабул қилишнинг охирги муддати — 2021 йил 8 октябрь.
Аввалроқ Маҳалла ва оилани қўллаб-қувватлаш вазирлиги ҳузурида Аёлларни реабилитация қилиш ва мослаштириш республика маркази ва унинг ҳудудий бўлимларига 2021 йилнинг 6 ойи давомида жами 5 958 нафар фуқаро мурожаат қилгани, шундан 5 348 нафари (89,7 фоизи) аёл, 393 нафари (6,6 фоизи) эркак ва 217 нафари (3,6 фоизи) 18 ёшгача бўлган болалар экани тўғрисида хабар берилганди.
Изоҳ (0)