Германияда 1 октябрдан буён Саксония федерал штатининг Польша билан чегарасини ноқонуний кесиб ўтишга уринган 76 нафар чет эл фуқароси қўлга олинди. Бу ҳақда Людвигсдорф федерал полициясига таяниб, «Korrespondent.net» хабар берди.
Полиция маълумотларига кўра, қўлга олинганлар Сурия, Эрон ва Яман фуқаролари. Бундан ташқари, қочқинларни Германияга олиб кирмоқчи бўлган уч киши ушланган, улардан бири тергов изоляторига жойлаштирилган.
Ўтган ҳафта Германия федерал полицияси Польша билан чегарада муҳожирлар сони ортганини яна бир бор такрорлади. Миграцион инқироз бошланганидан то шу йилнинг сентябрь ойи охиригача ноқонуний йўл билан келган жами 1556 муҳожир ушланган — августда 225 нафар, сентябрда 1305 нафар киши чегарани ноқонуний кесиб ўтгани қайд этилган. Келтирилган рақамларга кўра, ноқонуний муҳожирларнинг аксарияти Ироқ фуқаролари. Бундан ташқари, қочқинлар орасида Сурия, Эрон ва Яман фуқаролари ҳам бор.
Шунингдек, Литвада ҳам баҳордан буён миграция инқирози давом этмоқда. Мамлакатга Яқин Шарқ ва Африка мамлакатларидан юзлаб фуқаро — бари Беларусь орқали — кириб келмоқда. Ўтган йил билан таққослаганда, Беларусь—Литва чегараси орқали ўтаётган ноқонуний муҳожирлар оқими 39 баробарга ошган.
Литвада июль ойининг охирида фавқулодда ҳолат режими жорий қилинганди. Мамлакат Беларусь билан чегарада тўсиқ қуришни бошлаган. Шунингдек, Литва ҳукумати ўз ихтиёри билан мамлакатни тарк этишга рози бўлган ноқонуний муҳожирларга 300 евродан тўлашга ваъда бермоқда.
Беларусь ва Европа Иттифоқи чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланди. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Литва Беларусни ноқонуний муҳожирларга кўмак беришда аллақачон айблаб бўлди, бундай муҳожирлар учун мамлакатда яшаш тартиб-қоидаларини кучайтирди ва чегарада тикан симли девор ўрната бошлади.
Изоҳ (0)