Germaniyada 1-oktabrdan buyon Saksoniya federal shtatining Polsha bilan chegarasini noqonuniy kesib o‘tishga uringan 76 nafar chet el fuqarosi qo‘lga olindi. Bu haqda Lyudvigsdorf federal politsiyasiga tayanib, “Korrespondent.net” xabar berdi.
Politsiya ma’lumotlariga ko‘ra, qo‘lga olinganlar Suriya, Eron va Yaman fuqarolari. Bundan tashqari, qochqinlarni Germaniyaga olib kirmoqchi bo‘lgan uch kishi ushlangan, ulardan biri tergov izolyatoriga joylashtirilgan.
O‘tgan hafta Germaniya federal politsiyasi Polsha bilan chegarada muhojirlar soni ortganini yana bir bor takrorladi. Migratsion inqiroz boshlanganidan to shu yilning sentabr oyi oxirigacha noqonuniy yo‘l bilan kelgan jami 1556 muhojir ushlangan — avgustda 225 nafar, sentabrda 1305 nafar kishi chegarani noqonuniy kesib o‘tgani qayd etilgan. Keltirilgan raqamlarga ko‘ra, noqonuniy muhojirlarning aksariyati Iroq fuqarolari. Bundan tashqari, qochqinlar orasida Suriya, Eron va Yaman fuqarolari ham bor.
Shuningdek, Litvada ham bahordan buyon migratsiya inqirozi davom etmoqda. Mamlakatga Yaqin Sharq va Afrika mamlakatlaridan yuzlab fuqaro — bari Belarus orqali — kirib kelmoqda. O‘tgan yil bilan taqqoslaganda, Belarus—Litva chegarasi orqali o‘tayotgan noqonuniy muhojirlar oqimi 39 barobarga oshgan.
Litvada iyul oyining oxirida favqulodda holat rejimi joriy qilingandi. Mamlakat Belarus bilan chegarada to‘siq qurishni boshlagan. Shuningdek, Litva hukumati o‘z ixtiyori bilan mamlakatni tark etishga rozi bo‘lgan noqonuniy muhojirlarga 300 yevrodan to‘lashga va’da bermoqda.
Belarus va Yevropa Ittifoqi chegarasidagi migratsion inqiroz Aleksandr Lukashenkoning Minsk endi Yevropani muhojirlardan himoya qilmoqchi emasligini aytganidan keyin boshlandi. Shundan so‘ng, ommaviy axborot vositalarida xabar berilishicha, belaruslik chegarachilar chegarani noqonuniy kesib o‘tmoqchi bo‘lgan odamlarga jiddiy to‘sqinlik qilmaslik haqida yashirin ko‘rsatma olgan.
Litva Belarusni noqonuniy muhojirlarga ko‘mak berishda allaqachon ayblab bo‘ldi, bunday muhojirlar uchun mamlakatda yashash tartib-qoidalarini kuchaytirdi va chegarada tikan simli devor o‘rnata boshladi.
Izoh (0)