Афғонистонда муваққат ҳукумат тузган «Толибон» ҳаракатнинг 34 аъзосини давлат лавозимларига, жумладан, бир кишини вазирликка тайинлади. Тегишли қарор ҳаракат вакили, ахборот ва маданият вазири ўринбосари Забиҳулла Мужоҳиднинг Twitter’даги саҳифасида эълон қилинган, деб ёзади «ТАСС».
Ҳужжатга кўра, тасдиқланган ҳар бир лавозимга «Толибон»нинг фақат диний унвонга эга вакиллари тайинланган: тўрт нафар қори, 16 мулла ва 14 мавлавий (махсус диний таълим олган муллалар).
Хусусан, мулла Абдумажид Охунд шаҳидлар ва ногиронлар масалалари бўйича вазир лавозимини эгаллади ва шу тариқа сентябрь ойида тузилган муваққат ҳукуматнинг 23-аъзосига айланди. Мавлави Абдукабир бош вазирнинг сиёсий масалалар бўйича ўринбосари этиб тайинланди. Мавлавий Мати ул-Ҳаққ Афғонистон Қизил Ярим Ой жамияти раҳбари бўлди, ҳаракатнинг асосчиларидан бири, яқинда мамлакатда оммавий қатл қилиш амалиёти қайта тикланганини эълон қилган мулла Нуруддин Туробий эса унинг ўринбосари бўлди.
Қолган толиблар асосан вилоят маъмуриятлари раҳбарлари ёки уларнинг ўринбосарлари лавозимларига тайинланган. Қарор «Толибон» олий раҳбари Мавлави Ҳайбатулла Охундзода томонидан маъқулланган.
Маҳаллий матбуот қайд этишича, янги тайинланган 34 амалдорнинг деярли ҳаммаси пуштунлар, яъни Афғонистондаги энг катта этник гуруҳ вакилларидир.
Аввалроқ «Толибон» Афғонистонда Аёллар масалалари бўйича вазирликни тугатиб, унинг ўрнига Саховатни тарғиб қилиш ва иллатларни йўқотиш вазирлигини тузганди.
Мавзуга доир:
- Гуантанамо қамоқхонасининг собиқ маҳбуси, мулла Умарнинг болаликдаги дўсти ва бошқалар. «Толибон» ўзининг юқори мартабали фахрийларини асосий вазир лавозимларига тайинлади
- «Толибон» бир нечта вазирлик ва идораларга вақтинчалик раҳбарлар тайинлади
- Афғонистон собиқ президенти Ҳамид Карзай «Толибон» сиёсатини танқид қилиб чиқди
Изоҳ (0)