Олий Мажлис Қонунчилик палатаси депутати Расул Кушербаев Тошкент шаҳар прокуратураси биноси олдидаги дарахтлар кесилаётгани тўғрисида хабар берди. Пойтахт Экология ва атроф муҳитни муҳофаза қилиш бошқармасининг маълум қилишича, дарахтларни кесиш ишлари қонуний тарзда амалга оширилган.
Маълум қилинишича, Тошкент шаҳар экология бошқармасига пойтахтнинг Чилонзор тумани Лабиҳовуз кўчасида ноқонуний дарахтлар кесилиши юзасидан ижтимоий тармоқлар орқали мурожаат келиб тушган.
Вазиятга ойдинлик киритиш мақсадида Экология, Экопатруль ва ИИБ ходимларидан иборат махсус ишчи гуруҳи тузилиб, мурожаатда қайд этилган манзилда атрофлича ўрганиш ишлари олиб борилган.
Ўрганиш ишлари натижасига кўра, туман ҳудудидаги мавжуд табиий омиллар таъсирида касалланиб қуриган, инсон ҳаёти ва мол-мулкига хавф солувчи дарахтлар хатловдан ўтказилиб, хулоса асосида туман ҳокимининг қарорига мувофиқ қонуний тарзда кесилгани маълум бўлган.
Аввалроқ Тошкентдаги Мақом маркази қурилаётган ҳудудда 60 га яқин дарахт қуриб қолгани аниқланганди.
Изоҳ (0)