Ўзбекистон ташқи ишлар вазири Абдулазиз Комилов 3 октябрь куни АҚШ давлат котибининг биринчи ўринбосари Уэнди Шерман билан учрашув ўтказди, деб хабар бермоқда ТИВ матбуот хизмати.
Хабарда айтилишича, суҳбат чоғида Ўзбекистон—АҚШ кун тартибининг долзарб масалалари муҳокама қилинди. Абдулазиз Комилов Президент Шавкат Мирзиёев раҳбарлигида жамиятнинг барча соҳаларида амалга оширилаётган кенг кўламли ислоҳотлар ҳақида батафсил маълумот берди.
Давлат департаменти вакили АҚШ томони Ўзбекистонда олиб борилаётган кенг ўзгаришларни қўллаб-қувватлашини таъкидлади.
Минтақадаги вазият ва Афғонистондаги воқеалар ривожи юзасидан фикр алмашилди. Томонлар Афғонистонда кенг миллий ярашув ва инклюзив ҳукуматни шакллантириш жараёнига кўмаклашиш, мамлакатда инсоннинг асосий ҳуқуқ ва эркинликларига риоя этилишини таъминлаш, гуманитар инқирознинг олдини олиш зарурлигини таъкидлади.
Савдо-иқтисодий ва сармоявий ҳамкорликни ривожлантириш масалаларига алоҳида эътибор қаратилди. Бўлажак қўшма тадбирлар жадвали ва ташкилий жиҳатлари, хусусан, Стратегик ҳамкорлик мулоқотининг биринчи йиғилишини ўтказиш масалалари кўриб чиқилди.
ТИВ расмий вакили Юсуф Кабулжоновнинг маълум қилишича, Абдулазиз Комилов Moderna ва Pfizer вакциналарни беғараз тақдим этгани учун АҚШ ҳукуматига миннатдорчилик ҳам билдирди.
«Биз АҚШ ҳукуматидан мамлакатимизга Moderna ва Pfizer компаниялари томонидан ишлаб чиқарилган 5 миллиондан ортиқ дозадаги вакциналарни беғараз аснода тақдим этгани учун алоҳида миннатдормиз», — деган вазир.
Эслатиб ўтамиз, 30 июль куни Ўзбекистонга коронавирусга қарши 3 миллион 60 доза Moderna вакцинаси олиб келинганди. Вакцина АҚШ томонидан Жаҳон соғлиқни сақлаш ташкилотининг COVAX дастури доирасида ажратилган бўлиб, махсус ҳаво қатнови воситасида АҚШнинг Алабама штатидан мамлакатга етказиб берилган.
Изоҳ (0)