Маълум қилинишича, 3 октябрь куни соат 22:13 да Чилонзор туманининг 7-даҳасида жойлашган етти қаватли уйнинг 59-уйда газ-ҳаво аралашмасининг чақнаши содир бўлган.
Фавқулодда вазият оқибатларини бартараф этиш учун вазирликнинг 5 та ёнғин-қутқарув экипажи дарҳол воқеа жойига етиб борган. Мавжуд маълумотларга кўра, айни вақтда уй аҳолиси жабрланмаган. Қурбонлар йўқ.
Вазият оқибатида бир нечта квартираларга қисман зарар етган, дераза ва эшиклар шикастланган. «Айни вақтда ҳамкорликдаги хизматларнинг мутахассислари ушбу фавқулодда вазиятнинг сабабларини ўрганмоқда. 17 нафар уйи шикастланган фуқаро вақтинчалик меҳмонхонага жойлаштирилди», — дейилади хабарда.
ФВВ матбуот хизматининг «Дарё»га маълум қилишича, портлаш оқибатида подъезддаги 14 та хонадонга зарар етган. Хусусан, газ портлаган уйнинг ойналари ва эшиклари синган, унинг қаршисидаги хонадон эшигига ҳам зарарланган. Қолган хонадонларнинг асосан кириш эшикларига зарар етган холос. Меҳмонхонага жойлаштирилган фуқаролар эса 4 октябрдан секин-аста уй-уйига қайтаётгани айтилди.
Аввалроқ Сергелидаги омборхоналардан бирида газ портлаши оқибатида бир киши ҳалок бўлгани тўғрисида хабар берилганди.
Изоҳ (0)