Тошкент вилоятининг Оҳангарон туманида ЙПХ ходимлари ва фуқаролар ўртасида тортишув акс этган видео ижтимоий тармоқларда тарқалди. Вилоят ИИББ матбуот хизмати ҳолат юзасидан расмий маълумот берди.
Унда айтилишича, воқеа 1 октябрь куни Тошкент вилояти, Оҳангарон тумани ҳудудидан ўтувчи А-373а Олмалиқ—Тошкент автомобиль йўлининг 1-километрида юз берган. ЙПХ ходими КIА русумли автомобилни тўхтатган ва ҳайдовчига нисбатан Маъмурий жавобгарлик тўғрисидаги кодекснинг 126-моддаси тартибида баённома расмийлаштирган.
ЙҲХББ маълумотига кўра, маъмурий баённома транспорт воситасининг ён ойнаси рухсатсиз қорайтирилганлиги бўйича расмийлаштирилаётган бўлган.
Шу вақтида ушбу жойдан ўтаётган ҳолатга алоқадор бўлмаган шахс жараённи қўл телефонига тасвирга ола бошлаган. Шундан сўнг ЙПХ инспектори ушбу ҳолатга нотўғри баҳо бериб, ўринсиз ҳаракатларни амалга оширган. Жараёнда олинган видеотасвирлар ижтимоий тармоқларга тарқатилган ва муҳокамага сабаб бўлган.
Қайд этилишича, ҳозирда ҳолат юзасидан Тошкент вилояти ИИББ ЙҲХБ томонидан хизмат текшируви белгиланган бўлиб, жараёнда қатнашган барча ЙПХ инспекторлари ҳаракатларига ҳуқуқий баҳо берилади.
Изоҳ (0)