Қашқадарё вилоятининг қўшни Туркманистон билан чегарадош, вилоят марказидан 80 км узоқликда жойлашган Помуқ шаҳарчасида «Обод қишлоқ» ва «Обод маҳалла» давлат дастури асосида бунёдкорлик ва ободонлаштириш ишлари амалга оширилди. Бу ҳақда «Дарё»га маълум қилган Миришкор туман ҳокимлиги ахборот хизмати раҳбари Азизбек Яздурдиевнинг айтишича, мазкур ишлар 20 кун муддатда амалга оширилган.
Таъкидланишича, 18 минг аҳоли истиқомат қилувчи шаҳарчада, асосан, туркман миллатига мансуб фуқаролар, шунингдек, ўзбек, тожик, татар, қирғиз, рус ва корейс миллати вакиллари истиқомат қилади.
«Помуқ шаҳарчаси 1979 йилда ташкил этилган собиқ Баҳористон туманининг маркази ҳисобланган. 2003 йилда Баҳористон ва Усмон Юсупов туманлари бирлаштирилиб, янги ташкил этилган Миришкор тумани таркибига киритилган. 2009 йилда Вазирлар Маҳкамаси қарорига асосан шаҳарча мақоми берилган. Шаҳарчада собиқ иттифоқ даврида, шунингдек, мустақилликнинг илк йилларида қурилган бинолар мавжуд бўлиб, ҳозирги кунга келиб улар таъмирталаб, қаровсиз ҳолга келиб қолганди. Дастур асосида ‘Янги қишлоқ’, ‘Помуқ’, ‘Баҳористон’, ‘Гулобод’, ‘Тинчлик’ ва ‘Барҳаёт’ МФЙлар ҳудудидаги таъмирталаб 62,4 километр йўлнинг 19,2 километри асфальт, 12,6 километри қум-шағал ва 30,6 километри тупроқланиб таъмирланди», — дейди Азизбек Яздурдиев.
Маълум бўлишича, Помуқ шаҳарчаси ҳудудида 1980—1981 йилларда қурилган жами 15 та кўп қаватли, 2 та тўрт қаватли ва 13 та икки қаватли уй мавжуд бўлиб, тўрт қаватли уйлар таъмирталаб ҳолатга келиб қолган.
«Дастур асосида уйлар атрофида йўлакчалар қурилди, болалар майдончалари, ўриндиқлар ва тунги ёритиш чироқлари ўрнатилди. Маҳаллий бюджет маблағлари ҳисобидан кўп қаватли уйларда иситиш тизимини йўлга қўйиш мақсадида икки контурли иситиш қозонлар ўрнатиш ишлари олиб борилмоқда. Ҳудудда узоқ вақт давомида ичимлик суви линиялари орқали сув оқмаслиги ҳам бир қанча муаммоларни келтириб чиқарган. Шаҳарчадаги қурилиш ва таъмирлаш ишлари давомида ичимлик суви тармоғи ўтган 28 та кўчага маҳаллий бюджет маблағлари ҳисобидан кўча колодецлари ва сув ўлчаш асбоблари ўрнатилган ҳамда 1160 та хонадонга ичимлик суви тармоғи киритилган», — дейди ҳокимлик ахборот хизмати раҳбари.
Айтилишича, Помуқ шаҳарчасидаги истироҳат боғи ва унда жойлашган стелла ҳамда 1995 йилда Қарши шаҳридан олиб келиб ўрнатилган Мотамсаро она ҳайкали ҳам қайта таъмирланган.
«Вилоят бошқармалари ва бошқа ташкилотлар томонидан ихтиёрий ташаббус асосида 58 та хонадон жорий таъмирлаб берилди. Шунингдек, шаҳарча марказидаги Помуқ маданият маркази 1984 йилларда қурилган бўлиб, 1990 йилдан маданият маркази сифатида фаолият юрита бошлаган. Мазкур бино дастур асосида қайтадан реконструкция қилиниб, бино ичида хореография зали ва кутубхона ташкил этилди ҳамда марказнинг фаоллар залида замонавий ҳолатга келтирилди», — дейди Азизбек Яздурдиев.
Изоҳ (0)