Самарқанд вилояти Оқдарё туманида 4-синф ўқувчисига қўл кўтарган мактаб директори ўринбосарига чора кўрилди. Бу ҳақда туман Халқ таълими бўлими матбуот хизмати хабар берди.
Маълум қилинишича, тумандаги 53-мактабнинг 4-синфда ўқиётган Н.Б.га мактабнинг ўқув ишлари бўйича директор ўринбосари М.В. қўл кўтарган. Жабрланувчининг онаси бу ҳақда мурожаат йўллаган.
Қайд этилишича, Самарқанд вилояти Халқ таълими бошқармаси бошлиғи ўринбосари О.Жангиров, туман халқ таълими бўлими мудири С.Ортиқова ва бошқа масъуллар ушбу ҳолат бўйича ўрганиш ва тушунтириш ишларини олиб борган. Шундан сўнг директор ўринбосари М.В.га нисбатан интизомий чора қўлланилиб, ўз вазифасидан озод қилинган.
«Бу каби ҳолатларнинг олдини олиш мақсадида мактаб жамоаси иштирокида тушунтириш ишлари олиб борилган. Ҳозирда ўқувчи ва унинг ота-онаси томонидан ҳеч қандай эътирозлар йўқлигини маълум қиламиз», — дейилади хабарда.
Бундан аввал Самарқандда дарс пайтида оёғини парта устига қўйиб ўтирган мактаб ўқувчиларининг ота-оналари жаримага тортилгани, Жиззахдаги мактабларнинг бирида вояга етмаган ўқувчи ҳомиладор эканлиги ҳамда Бухорода ўғриликка қўл урган мактаб ўқувчисига суд ҳукми ўқилгани ҳақида хабар берилганди.
Изоҳ (0)