Ўзбекистон бош прокурори Ниғматилла Йўлдошев 29 сентябрь куни Тошкентга ташриф буюрган Россия бош прокурори Игорь Краснов билан учрашди. Бу ҳақда Бош прокуратура матбуот хизмати хабар берди.
Қайд этилишича, учрашув давомида Россия делегацияси вакилларига Президент Шавкат Мирзиёев бошчилигида Ўзбекистон ҳаётининг барча жабҳаларида, хусусан, суд-ҳуқуқ соҳасида амалга оширилаётган кенг кўламли ислоҳотлар, шунингдек, прокуратура органларининг фаолият йўналишлари ҳақида маълумот берилди.
Тарафлар ўзаро манфаатли бўлган кенг қамровли масалаларни муҳокама қилдилар ва идоралараро ҳамкорликни янада ривожлантириш истиқболлари бўйича фикр алмашди.
Хусусан, ҳуқуқбузарлик ва жиноятчиликнинг олдини олиш, коррупцияга қарши кураш соҳаларида тажриба алмашиш ҳамда прокуратура органлари ходимларини тайёрлаш, қайта тайёрлаш ва малакасини ошириш соҳаларида икки томонлама ҳамкорлик алоқаларини мустаҳкамлаш масалалари муҳокама этилди.
Учрашув якунига кўра ҳар икки давлат Бош прокуратураси ўртасида илм-фан ва таълим соҳаларида ҳамкорлик тўғрисида меморандум ҳамда 2021—2023 йилларга мўлжалланган идоралараро ҳамкорлик дастури имзоланди.
Ушбу ҳужжатларнинг амалда татбиқ этилиши ҳуқуқий соҳада ахборот ва илғор тажриба алмашиш орқали икки томонлама шерикликни янги босқичга кўтаришга хизмат қилиши таъкидланди.
Тадбир якунида Ниғматилла Йўлдошев Игорь Красновга ҳамкорликни ривожлантиришга қўшган ҳиссаси учун миннатдорчилик изҳор қилди ва «Ўзбекистон Республикаси прокуратурасининг фахрий ходими» кўкрак нишони билан тақдирлади.
Изоҳ (0)