ДХХ ходимлари томонидан «Туркистон ислом ҳаракати» («ТИҲ») халқаро террористик ташкилоти аъзоси, Ўзбекистон ҳудудида ўта оғир жиноятлар содир этгани сабабли 23 йилдан буён қидирувда бўлган Ю.Ж. хорижда ушланиб, мамлакатга олиб келинди. Бу ҳақда идора матбуот хизматига таяниб, ЎзА хабар берди.
Маълум қилинишича, 1969 йил Тошкент вилоятида туғилган ушбу шахс 1998 йилнинг бошларида Чеченистонга бориб, иорданиялик Амир Хаттоб томонидан ташкил қилинган жангарилар лагерида махсус тайёргарликдан ўтган ва ўша йилнинг охирларида Афғонистондаги «ТИҲ» халқаро террористик ташкилоти сафига қўшилган.
1999 йилнинг январь ойида ташкилот етакчиларининг кўрсатмаси билан у айланма йўллар орқали Тошкент шаҳрига келиб, бадавлат одамларнинг уйларида босқинчиликларни амалга оширган ҳамда уларнинг пул ва қимматбаҳо буюмларини ўзлаштириб, Афғонистондаги «ТИҲ» етакчиларига юборган.
Мазкур шахс 1999 йилнинг 16 февраль ва 30 март кунлари Тошкент шаҳрида амалга оширилган қўпорувчилик ҳаракатларида ҳам иштирок этгани айтилмоқда. Шунингдек, у 1998—2006 йилларда хорижий давлатлардаги халқаро террористик ташкилотлар сафида жанговар ҳаракатларда қатнашган.
Ҳозирда Ю.Ж.га нисбатан қўзғатилган жиноят иши доирасида тергов ҳаракатлари олиб борилмоқда.
Аввалроқ Тошкентда ва Тошкент вилоятида «Ҳизб ут-Таҳрир»га аъзо 29 нафар аёл аниқлангани, Тошкентда халқаро террорчилик ташкилотларининг яна бир гуруҳ аъзолари ушлангани тўғрисида хабар берилганди.
Изоҳ (0)