21 сентябрь — Халқаро тинчлик кунига бағишланган хайрия тадбири ўтказилди. 105 нафар бола, улар Тошкент шаҳри Яшнобод туманидаги 30-сон Меҳрибонлик уйи болалари тарбияланувчилари, энг кичиклари энди етти ёшга кирган, катталари ҳадемай ўн етти ёшга киради. Мурғаклигиданоқ ҳамма каби бўлолмаслик, ҳамма каби яшолмаслик тақдирига битилган бир юз бешта дилпора юрак. Улар жисмоний имконияти чекланган болалар, лекин бошқа жиҳатларига кўра, бошқа тенгдошларидан кам фарқ қиладилар. Улар ҳам меҳрга, эътиборга чанқоқ, ҳаётида байрам ва хурсандчиликлар кўп бўлишини истайди. Энг муҳими, бир фазилат уларга жуда хос: болалар уйи болалари ҳар қандай, ҳатто арзимас ғамхўрликни ҳам қалбан чуқур ҳис этадилар, хурсандчилик онларида бутун борлиғи билан қувонадилар ва бу онларни хотирада узоқ сақлайдилар.
Яхшиямки, мамлакатимизда бундай болалар учун мўлжалланган ўнлаб махсус муассасалар мавжуд бўлиб, уларнинг барчасида болаларнинг тарбияланиши, тўлақонли билим олиши, маънавий-жисмоний етук бўлиб вояга етиши учун шароитлар яратилган. Ҳа, балки улар бенуқсон эмасдир, ота-она меҳридан маҳрумдирлар, лекин давлат миқёсидаги ғамхўрлик ва эътибордан бебаҳра эмаслар. Бундан ташқари, турли нодавлат ташкилотлари, ҳомий компаниялар, шунчаки яхши одамлар ҳам уларга меҳр-оқибат кўрсатадилар.
Enter Engineering компаниялари гуруҳи томонидан Ўзбекистон Республикаси ИИВ ЙҲХББ, Тошкент шаҳар ИИББ Хавфсиз туризмни таъминлаш бошқармаси, Humo Arena муз саройи маъмурияти ва Enter Engineering касаба уюшмаси қўмитаси билан ҳамкорликда ташкиллаштирилган навбатдаги хайрия тадбиридан кўзланган мақсад 30-сон Меҳрибонлик болалар уйининг 28 нафар тарбияланувчиси учун маданий-кўнгилочар саёҳатни ташкил этиш эди.
Барча ташкилий масалалар режалаштирилган саёҳатни кўнгилли ўтказиш ва болалар хавфсизлигини таъминлашга қаратилди. Болалар мактабдаги дарслар тугагач, қулай автобусда юртимиздаги энг катта спорт-кўнгилочар мажмуаси — Humo Arena’га йўл олдилар, у ерда махсус гид болаларга муз саройи ҳақида сўзлаб берди. Муз саройи бўйлаб қизиқарли экскурсиядан кейин болалар учун энг ёқимли машғулот бошланди. Улар конкилар кийиб, муз устида уча бошлашди.
Ярқираган муз устида сирпаниб учаётган болаларнинг завқ-шавққа тўлиб, қувониб кулишларини кўриб, бу бахтли онлар уларнинг шуурида ёқимли хотиралар сифатида муҳрланишига амин бўлдик. Олдинда эса уларни музда учишдан ҳам қизиқроқ машғулот — сегвей ва электрокарлардаги сайр кутмоқда эди.
Бу техникани кўриб, уларнинг кўзида болаларча қизиқувчанлик учқунлари порлаб кетди. Айниқса ўғил болаларда бу ажойиб транспортларнинг бошқарилиши ҳақида жуда кўп саволлар туғилди. Уларнинг ҳамма саволларига йўл патруль хизмати ва туристик полиция ходимлари эринмасдан жавоб беришди.
Барча ёқимли саргузаштлардан кейин болалар ва уларнинг тарбиячилари Диэт кафеда тузалган кечки таом дастурхонига таклиф этилди. Ёш меҳмонларимизни кузатишдан аввал уларнинг ҳар бирига компаниямиз ишчи ходимлари номидан эсдалик совғалари тақдим этилди. Улар учун ташкиллаштирилган мароқли саргузаштлар, кўрсатилган ғамхўрлик, меҳр учун болалар ўз миннатдорчиликларини шўх-шодон кулгулари ва қувонч ила ийманиб айтилган «Катта раҳмат!», деган сўзлар билан ифода этишди.
Шуни куни маълум вақт ўтиб бизга болалар уйи директори Феруза Собитовна Усмонхўжаева қўнғироқ қилиб, ушбу тадбир ташкилотчиларига миннатдорчилик билдирди:
«Болалар саёҳатдан қувончга тўлиб қайтишди, дарров бошқа болаларга ўз таассуротлари ва саргузаштларини завқ билан сўзлаб, совғаларини кўрсатишди. Тўғри, муассасамиз тўлиқ давлат таъминотида, ҳамма нарсамиз етарли, лекин четдан кўрсатилган эътибор болаларимиз учун жуда қадрли. Улар жисмоний ноқислигига қарамай жуда интилувчан, қизиқувчан. Кўпчилиги ҳунар ўрганишади, қизлар тикиш-бичиш, пазандачиликка, ўғил болалар эса турли жиҳозлар ясашга қизиқишади. Баъзан улар ясаган буюмлар усталарникидан ҳам яхши чиқади. Бизда 16 та турли йўналишдаги тўгараклар, жумладан, спорт ва мусиқа тўгараклари очилган. Болалар билан дефектолог-педагоглар, мураббийлар тинимсиз ишлашади. Биз уларнинг кам-кўстликни ҳис қилмай вояга етиши, ҳаётда ўз ўрнини топиши учун барча имкониятларимизни ишга солаяпмиз. Бунда бизга мутасадди ташкилотлар, Enter Engineering каби компаниялар яқиндан кўмак кўрсатишмоқда. Компанияга ўз лойиҳаларини амалга оширишда муваффақият, изчил тараққиёт ва хайрли ишларида омад тилайман».
Enter Engineering матбуот хизмати
Изоҳ (0)