«Толибон» Афғонистон аҳолисига сартарошхоналарда соқол олдиришни тақиқлади
«Толибон» эркаклар сартарошхоналарига мижозларнинг соқолларини қиртишлаб олиб ташлашни тақиқлади. Ушбу тақиқни Афғонистон янги ҳукумати шариат қоидалари билан изоҳлади.Тегишли буйруқлар Ҳилманд ва Ҳирот вилоятларидаги, шунингдек, Кобулдаги сартарошхоналарга келиб тушган.
Сартарошхоналар эгалари ва ходимларининг сўзларига кўра, мазкур тақиқ уларнинг бизнесини касодга учраганини билдиради.
Таъкидланишича, 2011 йилда толиблар ҳокимиятдан четлатилгач, сартарошхоналар, биринчи навбатда, ёшлар орасида барқарор тарзда оммалашиб кетган эди.
Мавзуга доир: «Қўлларни чопиб ташлаш хавфсизликни таъминлаш учун зарур». «Толибон» Афғонистонда жисмоний жазоларни қайтадан жорий қилмоқчи
Афғонистон собиқ президенти «Толибон» билан ҳамкорликка даъват этди
Афғонистоннинг қочоқ президенти Ашраф Ғанининг Facebook’даги саҳифасида унинг номидан халқаро ҳамжамиятга қаратилган «Толибон» ҳукуматини қўллаб-қувватлашга қаратилган даъват пайдо бўлди.
«Халқаро ҳамжамият афғон халқидан ўзини четга олмасдан, жорий ҳукумат билан ҳамкорлик қилиши керак», — дейилган Ғанининг постида.
«Уларга ёрдам беринг, музлатилган маблағларни афғон халқига қайтаринг ва уларни (Афғонистоннинг янги ҳукуматини) тан олинг», — дейилган собиқ президент хабарида.
Бироз вақт ўтгач, Афғонистон собиқ президентининг Twitter саҳифасида унинг Facebook’даги аккаунти аввалроқ хакерлик ҳужумига учрагани ҳақида хабар пайдо бўлди. Ғани огоҳлантиришича, у аккаунтини ўз қўлига қайтариб олмагунича, у ердаги барча постларни ҳам ҳақиқатга тўғри келади, деб ҳисоблаш мумкин эмас.
Толиблар Афғонистонга халқаро рейсларни қайта тиклашни сўради
«Толибон» авиакомпаниялардан Афғонистонга халқаро рейсларни қайта тиклашни сўради. Толиблар ҳукумати авиакомпаниялар билан тўлиқ ҳамкорлик қилишга ваъда бериб ва Кобул аэропортидаги муаммолар ҳал қилинганини айтиб, халқаро парвозларни қайта бошлашга даъват этди.
Афғонистон Ташқи ишлар вазирлиги расмий вакили Абдулқаҳҳор Балхийнинг айтишича, халқаро рейслар тўхтаб қолиши натижасида афғонлар иш ва ўқиш юзасидан саёҳат қилиш имкониятидан маҳрум бўлган.
Ҳокимият тепасига «Толибон» келганидан буён аэропортдан чекланган миқдорда гуманитар ва йўловчи рейслари амалга оширилган. Аммо тижорий хизматлар қайта бошланганича йўқ, чунки аэропорт ўн минглаб хорижликлар ва афғонларнинг тартибсиз эвакуация қилиниши натижасида ёпилган эди.
Кейинроқ ҳаво бандаргоҳи Қатар ва Туркия техник гуруҳлари ҳамкорлигида очилди. Ҳозир баъзи авиакомпаниялар, шу жумладан, Покистон халқаро ҳаво йўллари чекланган хизматларни таклиф қилмоқда, бироқ чипталар нархлари одатдагидан кўп баробар қимматроқ.
Мавзуга доир: Кобул халқаро аэропорти расман қайта ишга тушди
Қозоғистон Афғонистон ҳукумати билан алоқаларни йўлга қўйишга тайёр
Қозоғистон Афғонистон янги ҳукумати билан ишчи алоқаларни ўрнатишга тайёр, аммо уларни тан олиш ҳақида ҳозирча гап бормаяпти, деди Қозоғистон ТИВ расмий вакили Айбек Смадияров Республиканинг Кобулдаги элчиси Алимхан Есенгелдиев ва Афғонистон муваққат ҳукумати ташқи ишлар вазири вазифасини бажарувчи Амирхон Муттакий ўртасида бўлиб ўтган учрашувни изоҳлар экан.«Учрашувда Қозоғистон Республикаси номидан афғон халқига гуманитар ёрдам бериш ва савдо масалалари муҳокама қилинди. Бундан ортиқ ҳеч нарса йўқ. Тан олиш ҳақида ҳозирча гап бормаяпти. Биз янги ҳукумат билан ишчи муносабатларни йўлга қўйишга тайёрмиз. Бу ҳозир ушбу мамлакат олдида турган гуманитар масалаларни ҳал қилиш учун муҳим», — деди Смадияров.
Сентябрь бошида Қозоғистон президенти Қосим-Жўмарт Тўқаев республика, биринчи навбатда, жуда зарур гуманитар муаммоларни ҳал қилиш учун янги ҳукумат билан конструктив ишчи алоқаларни йўлга қўйишга тайёрлигини маълум қилган эди.
Афғонистонда тез орада янги намунадаги паспортлар берилади
Афғонистон фуқаролари томонидан аввалги режим даврида олинган паспортларнинг барчаси амалда қолади, аммо тез орада «Афғонистон ислом амирлиги» (мамлакатда ҳокимиятни эгаллаб олган «Толибон» ўз-ўзига берган ном) деган давлат номи туширилган янги намунадаги ҳужжатлар берила бошлайди. Бу ҳақда муваққат ҳукумат ахборот ва маданият вазири ўринбосари вазифасини бажарувчи Забиҳулла Мужоҳид маълум қилди.Сўнгги вақтларда Афғонистонда паспортлар берилиши тўхтатиб қўйилган эди, бу эса мамлакатнинг бир нечта шаҳарларида кетма-кет намойишларни келтириб чиқарган эди. 20 сентябрь куни «Толибон» раҳбарияти Аълам Ғулом Ҳаққонийни Афғонистон ИИВ ҳузуридаги паспортлар бериш масалалари бўйича бош бошқарманинг янги бошлиғи этиб тайинлаган эди.
Изоҳ (0)