Жонс Ҳопкинс университети маълумотларига кўра, дунёда коронавирусга чалинганлар сони 229 053 099 кишини ташкил қилмоқда, шуларнинг 4 699 734 нафари вафот этган. Касалланганлар сони бўйича АҚШ (42,2 миллион), Ҳиндистон (33,4 миллион), Бразилия (21,2 миллион), Буюк Британия (7,5 миллион) ва Россия (7,1 миллион) етакчилик қилмоқда. Бундан ташқари, жаҳонда шу пайтга қадар қўлланилган коронавирусга қарши вакциналар 5,936 миллиард дозадан ошди.
Pfizer вакцинаси беш ёшдан ошган болалар учун хавфсиз бўлиб чиқди
Pfizer ва BioNTech компанияларининг коронавирусга қарши вакцинаси 5 дан 11 ёшгача бўлган болалар орасида синовларнинг иккинчи босқичидан муваффақиятли ўтди.«5—11 ёшдаги иштирокчилар учун вакцина хавфсиз бўлиб чиқди, уни яхши қабул қилишди ва антитаналарнинг барқарор нейтраллаштирувчи реакцияси қайд этилди», — дейилади Pfizer баёнотида.
Аниқлик киритилишича, синовларда қатнашган 12 ёшгача бўлган болаларга уч ҳафталик танаффус билан препарат ҳар бири 10 мкг бўлган иккита дозада киритлган. Ушбу ёшдаги болалар учун 10 мкг дозировка хавфсизлик ва иммунитет ҳосил бўлиши нуқтаи назаридан оптимал ҳисобланади. 12 ёшдан катталарга юбориладиган ҳар битта доза эса 30 мкгга тенг.
Иккинчи дозадан кейин болаларда «кучли» иммунитет реакцияси аниқланган, кузатилган ножўя таъсирлар эса 16—25 ёшли иштирокчиларда қайд этилганлари билан ўхшаш бўлган.
Pfizer тадқиқот натижаларини иложи борича тезроқ АҚШ ва Евроиттифоқнинг ваколатли органларига юбориш ниятида.
Шунингдек, Pfizer 2021 йил охиригача 2—5 ёш ҳамда 0,5—2 ёшли болалар орасида ўтказилган синовлар натижаларини ҳам эълон қилади.
Мавзуга доир: COVID-вакцина 6 ойлик болаларда синовдан ўтказилади, Қозоғистон аҳолисининг 60 фоизи эмланди. Коронахабарлар
АҚШ ноябрдан тўлиқ эмланган сайёҳлар учун ўз чегараларини очади
АҚШ пандемия бошида Евроиттифоқ ва бошқа мамлакатлардан кириш учун қўйилган чекловларнинг аксарияти бекор қилинишини эълон қилди. Ноябрдан тўлиқ эмланган сайёҳлар мажбурий карантиндан ўтмасдан мамлакатга кириши мумкин бўлади.Коронавирусга қарши тўлиқ эмланмаган чет элликлар АҚШга сафардан олдин ва у ерга етиб келганидан кейин тест топшириши керак бўлади.
АҚШга киришга тақиқ 2020 йил мартида ўша пайтдаги президент Дональд Трамп томонидан жорий қилинган эди. Айни пайтда ушбу тақиқ Шенген ҳудуди мамлакатлари, Буюк Британия, Ирландия, Хитой, Ҳиндистон, Жанубий Африка Республикаси, Бразилия ва Эрон учун ҳамон амал қилиб келмоқда. Жо Байден президентликка киришганидан кейин бу чекловларни бекор қилишдан бош тортиб, Евроиттифоқ ва АҚШнинг ўзида танқидларга учради. Евроиттифоқ америкаликлар учун шундай тақиқни июнда бекор қилганди.
Мавзуга доир: Трамп Байденнинг инаугурациясидан бир кун аввал коронавирус туфайли АҚШга киришга қўйилган тақиқни бекор қилди
Чехия аҳолиси COVID-вакцинанинг учинчи дозаси билан эмланади
Чехияда касалланиш ҳолатларининг ортиши фонида аҳоли коронавирусга қарши вакцинанинг учинчи дозаси билан эмланишни бошлайди.Мамлакат Соғлиқни сақлаш вазирлиги 60 ёшдан ошганлар, тиббиёт ходимлари ва хавф гуруҳида бўлган бошқа фуқароларга вакцинанинг учинчи дозасини юборишни тавсия қилди.
20 сентябрь, душанба куни қарийб 8 минг кишига учинчи доза билан эмланиш ҳуқуқига эга экани ҳақида ҳукуматдан хабарномалар юборилган.
Учинчи дозани иккинчисидан камида саккиз ой ўтгач олиш мумкин. Иммун тизими заиф бўлган ва жиддий касалликлари бўлган одамлар эса «бустер» дозасини тўрт ҳафтадан кейин олади.
Қўшимча дозалар сифатида Pfizer ва Moderna вакциналаридан фойдаланилади.
Чехияда пандемия бошидан буён 1,6 миллиондан ортиқ одам коронавирусга чалинган, шуларнинг қарийб 30 минги вафот этган. Аҳолининг 5,9 миллион нафари тўлиқ эмланган.
Грецияда коронавирус чекловлари муддати узайтирилди
Греция ҳукумати коронавирус билан боғлиқ чекловларнинг амал қилиш муддатини 27 сентябргача узайтирди, шунингдек, сайёҳларга трансфер буюртма қилишда вакцинация сертификати, манфий натижали ПЗР-тест ёки экспресс тестни тақдим этиш мажбуриятини юклади.Бино ичида жойлашган кафе, бар, ресторан, тунги клуб ва дискотекаларга ташриф буюриш бўйича чекловлар ўз кучида қолди: у ерга фақат эмланганлар ёки касал бўлиб ўтганлар киритлади.
Ўқув муассасалари масофадан дарс беришда адавом этмоқда. Бино ичида ишлайдиган хизмат кўрсатиш соҳасининг эмланмаган ходимлари ҳафтада бир марта коронавирусга таҳлил топшириши керак. Санитария меъёрлари ва ниқоб режимига риоя қилмаганлар 300 евро жаримага тортилади.
Пандемия бошидан буён Грецияда 630 784 киши коронавирусга чалиниб, 14 466 киши вафот этган. Сўнгги бир кеча-кундузда касалланиш бўйича 1305 та ҳолат аниқланган, 33 киши вафот этган.
Изоҳ (0)