Chexiya sog‘liqni saqlash vaziri Petr Arenberger o‘z lavozimini tark etadi va mamlakatda pandemiya boshidan buyon vazirlik boshqaruvini tark etgan to‘rtinchi amaldorga aylanadi. Bu haqda Associated Press xabar berdi.
Ta’kidlanishicha, 7-apreldan vazir lavozimini egallagan Arenberger Bryusseldagi (Belgiya poytaxti) Yevroittifoq sammitida ishtirok etayotgan Chexiya bosh vaziri Andrey Babishga qo‘ng‘iroq qilib, iste’foga chiqishini aytdi. Soliq hisobotida qayd etilgan qonunbuzarliklar bo‘yicha vazirga qo‘yilgan ayblov uning iste’fosiga sabab bo‘lgani aytilmoqda.
“Jamiyat salomatligi uchun ishlash jarayonida mening oilam, do‘stlarim, hamkasblarim tobora ko‘payib borayotgan noxush bosimga duchor bo‘lmasligi kerak, deb o‘ylayman”, — dedi Arenberger.
O‘z navbatida Babishning ta’kidlashicha, Arenberger iste’fosiga aynan unga va uning oilasiga bo‘lgan bosim sabab bo‘lgan.
Babish sog‘liqni saqlash vaziri lavozimiga Adam Voytexning nomzodini ko‘rsatishni rejalashtirayotganini qo‘shimcha qildi. Voytex Chexiyada koronavirus pandemiyasi boshlangan vaqtda aynan shu lavozimda faoliyat yuritayotgan edi. 2020-yilning 21-sentabr kuni Voytexning o‘rniga lavozimni egallagan Roman Primula koronavirusning tarqalishini cheklash bo‘yicha karantin choralari doirasida yopilishi belgilangan restoranga tashrifi paytida suratga tushganidan keyin iste’foga chiqishga majbur bo‘lgan.
Keyinroq 29-oktabrda vazirlik lavozimini Yan Blatni egalladi. Lekin u epidemiyaga qarshi ko‘rilgan choralar, shu jumladan, koronavirusga qarshi Rossiyaning “Sputnik V” vaksinasini sotib olishdan bosh tortgani sababli o‘z lavozimidan ozod etildi va vazirlik boshqaruvi Arenbergerga topshirildi.
Associated Press ma’lumotlariga ko‘ra, Chexiyada kasallanish darajasi pasaymoqda. 24-may kuni mamlakatda koronavirus bilan kasallanish bo‘yicha 695 ta yangi holat ro‘yxatga olindi, mart oyining boshida bu ko‘rsatkich 17 mingga yetgan edi. Pandemiya boshidan buyon Chexiyada 1,7 millionga yaqin odam koronavirus bilan kasallandi, ularning 30 mingdan ortig‘i virus qurboniga aylandi.
Mavzuga doir:
- Slovakiyada “Sputnik V” vaksinasiga oid mojaro tufayli bosh vazir almashtirildi
- Avstriya sog‘liqni saqlash vaziri “ortiqcha yuk” tufayli iste’foga chiqdi
- Qirg‘izistonda koronavirusga chalingan bemorlarni zaharli o‘t bilan davolash haqida aytgan sog‘liqni saqlash vazirining iste’fosi talab qilinmoqda
Izoh (0)