Туркия президенти Ражаб Тоййиб Эрдўғон АҚШдаги мусулмонлар жамияти вакилларини қабул қилди. Қабул Нью-Йоркдаги Манхэттен марказида (The Manhattan Center) ёпиқ тарзда ўтказилди, деб ёзади Anadolu Agency.
Туркия президенти Ражаб Тоййиб Эрдўғон Бирлашган Миллатлар Ташкилоти Бош Ассамблеясининг 76-сессиясида иштирок этиш учун 19—22 сентябрь кунлари АҚШда бўлиб туради. 20 сентябрь, душанба куни Эрдўғон Нью-Йоркдаги Турк уйининг очилиш маросимида иштирок этди.
Туркия давлати раҳбари 21 сентябрь куни Бош Ассамблеянинг 76-сессияси ўтказиладиган биринчи кунда тадбир иштирокчиларига мурожаат қилади. Сессия COVID-19 пандемиясининг олдини олиш, барқарорликни тиклаш, сайёрамиз эҳтиёжларига жавоб бериш, инсон ҳуқуқларини ҳурмат қилиш ва БМТни қайта тиклаш каби мавзуларга бағишланади.
Сессия доирасида Туркия раҳбари бир қатор давлатлар раҳбарлари, шунингдек, БМТ бош котиби Антониу Гутерриш билан икки томонлама учрашувлар ўтказади.
Эрдўғон Турк—Америка миллий мувофиқлаштирувчи қўмитаси томонидан уюштириладиган «Дунё адолатлироқ бўлиши мумкин» номли конференцияда иштирок этиб, турк ва мусулмон жамоалари вакиллари билан учрашади ва Америка матбуотига интервью беради.
Президент Эрдўғон, шунингдек, АҚШ ишбилармон дунёси вакиллари иштирокида Туркиянинг 11-инвестиция конференциясининг анъанавий гала кечки овқатида қатнашиши кутилмоқда.
Аввалроқ Эрдўғон ўзининг янги китобини АҚШда дунёнинг етакчи давлатлари раҳбарларига тақдим этиши ҳақида хабар берилганди. Туркияда Эрдўғоннинг «Дунё адолатлироқ бўлиши мумкин» («Yana adil dunyo mumkun») номли янги китоби 6 сентябрдан сотувга чиқарилганди. Қайд этилишича, китобнинг инглиз, араб, немис, француз, рус ва испан тилларига таржима қилинишидан тушадиган маблағларнинг барчаси Туркия Фавқулодда вазиятлар бошқармасига ўтказилади.
Изоҳ (0)