Совет шахматчиси Нона Гаприндашвили «Қироличанинг юриши» сериали ижодкорларига қарши 5 миллион долларлик даъво аризаси билан судга мурожаат қилди

Совет ва грузин шахматчиси Нона Гаприндашвили сериалда рус шахматчиси сифатида намойиш этилганидан хафа бўлган ва у эркакларга қарши ўйнамаганлигини маълум қилган. Шунинг учун ҳам Гаприндашвили 5 миллион доллар миқдорда маънавий компенсация талаб қилмоқда.

Совет ва грузин шахматчиси Нона Гаприндашвили шахматчининг бадиий ҳикоясига асосланган «Қироличанинг юриши» сериали ижодкорларини судга берди. Даъво сабаби туҳмат: охирги эпизодда бош қаҳрамон Бет Хармон эркак рақиби билан ўйнаган саҳнасида шарҳловчи Нона Гаприндашвилини эслатиб, у ҳеч қачон эркаклар билан ўйнамаганини айтади. Бу нотўғри, чунки шахматчи ўтган асрнинг 60 йилларида эркаклар билан беллаша бошлаган ва 1978 йилда эркаклар орасида халқаро гроссмейстер унвонини олган биринчи аёл ҳисобланади.

Гаприндашвилининг адвокати даъвосида таъкидланишича, 1968 йилда сериал сюжетида Бет Хармоннинг финал учрашуви бўлиб ўтганида, шахматчи камида 59 киши, шу жумладан, гроссмейстерлар билан ўйнашга муваффақ бўлган. Гаприндашвили ёлғон воқеани сериалдан чиқариб ташлашни, шунингдек, унга «миллионлаб томошабинлар олдида ютуқларига путур етказувчи ва таҳқирловчи ёлғон» учун маънавий компенсация сифатида 5 миллион доллар миқдорда пул тўлашни талаб қилмоқда. Қолаверса, Гаприндашвилининг рус шахматчиси сифатида талқин этилганидан жаҳли чиққан.

«Қироличанинг юриши» 2020 йили Netflix’да чиқарилган эди. Дастлабки ойда уни 62 миллион киши томоша қилган. Сериал иккита «Олтин глобус» мукофотини «Энг яхши минисериал» ёки «Телевизион фильм» ҳамда «Энг яхши актриса» номинацияси бўйича ғолибликни Бет Хармон ролини ўйнаган Аня Тэйлор-Жой қўлга киритди. Netflix вакиллари аллақачон Нона Гаприндашвилининг даъвосига муносабат билдирган ва шахматчининг ҳурматига қарамай, улар унинг даъвосига қўшилмаслигини ва ўз ишини ҳимоя қилишини таъкидлаган.

Маълумот учун, Нона Гаприндашвили 1941 йилда Грузияда туғилган. Нонага 5 ёшида акалари шахмат ўйинини ўргатган. 12 ёшидан Гаприндашвили Тбилиси пионерлар саройида шахматни ўрганган ва 15 ёшида Тбилиси ва Грузия чемпиони бўлган. 1976 йилда у биринчи халқаро аёл гроссмейстер, 1982 йилда эса шахмат бўйича «Оскар» мукофотининг биринчи ғолиби бўлган.