Sovet va gruzin shaxmatchisi Nona Gaprindashvili serialda rus shaxmatchisi sifatida namoyish etilganidan xafa bo‘lgan va u erkaklarga qarshi o‘ynamaganligini ma’lum qilgan. Shuning uchun ham Gaprindashvili 5 million dollar miqdorda ma’naviy kompensatsiya talab qilmoqda.
Sovet va gruzin shaxmatchisi Nona Gaprindashvili shaxmatchining badiiy hikoyasiga asoslangan “Qirolichaning yurishi” seriali ijodkorlarini sudga berdi. Da’vo sababi tuhmat: oxirgi epizodda bosh qahramon Bet Xarmon erkak raqibi bilan o‘ynagan sahnasida sharhlovchi Nona Gaprindashvilini eslatib, u hech qachon erkaklar bilan o‘ynamaganini aytadi. Bu noto‘g‘ri, chunki shaxmatchi o‘tgan asrning 60-yillarida erkaklar bilan bellasha boshlagan va 1978-yilda erkaklar orasida xalqaro grossmeyster unvonini olgan birinchi ayol hisoblanadi.
Gaprindashvilining advokati da’vosida ta’kidlanishicha, 1968-yilda serial sujetida Bet Xarmonning final uchrashuvi bo‘lib o‘tganida, shaxmatchi kamida 59 kishi, shu jumladan, grossmeysterlar bilan o‘ynashga muvaffaq bo‘lgan. Gaprindashvili yolg‘on voqeani serialdan chiqarib tashlashni, shuningdek, unga “millionlab tomoshabinlar oldida yutuqlariga putur yetkazuvchi va tahqirlovchi yolg‘on” uchun ma’naviy kompensatsiya sifatida 5 million dollar miqdorda pul to‘lashni talab qilmoqda. Qolaversa, Gaprindashvilining rus shaxmatchisi sifatida talqin etilganidan jahli chiqqan.
“Qirolichaning yurishi” 2020-yili Netflix’da chiqarilgan edi. Dastlabki oyda uni 62 million kishi tomosha qilgan. Serial ikkita “Oltin globus” mukofotini “Eng yaxshi miniserial” yoki “Televizion film” hamda “Eng yaxshi aktrisa” nominatsiyasi bo‘yicha g‘oliblikni Bet Xarmon rolini o‘ynagan Anya Teylor-Joy qo‘lga kiritdi. Netflix vakillari allaqachon Nona Gaprindashvilining da’vosiga munosabat bildirgan va shaxmatchining hurmatiga qaramay, ular uning da’vosiga qo‘shilmasligini va o‘z ishini himoya qilishini ta’kidlagan.
Ma’lumot uchun, Nona Gaprindashvili 1941-yilda Gruziyada tug‘ilgan. Nonaga 5 yoshida akalari shaxmat o‘yinini o‘rgatgan. 12 yoshidan Gaprindashvili Tbilisi pionerlar saroyida shaxmatni o‘rgangan va 15 yoshida Tbilisi va Gruziya chempioni bo‘lgan. 1976-yilda u birinchi xalqaro ayol grossmeyster, 1982-yilda esa shaxmat bo‘yicha “Oskar” mukofotining birinchi g‘olibi bo‘lgan.
Izoh (0)