Муҳаббат ўлимдан ҳам кучлироқ эканлиги акс этган таъсирли фильмлар (фото)

Баъзан киноларда бош қаҳрамонларнинг муҳаббати шу қадар кучли бўладики, ҳатто ўлимни ҳам енга олади. Cosmopolitan инсонга ёки қандайдир ишга бўлган муҳаббат мўъжиза яратишга қодирлиги акс эттирилган таъсирли фильмлар жамланмасини эътиборингизга ҳавола этади.

«Руҳ» (Ghost)

Бош ролни гавдалантирган Патрик Суэйзининг қаҳрамони фильмда вафот этган бўлса ҳам, қайлиғини ҳимоя қилишда давом этади. Ёрдам бериш мумкин бўлган имконият топилмагунича, турли қийинчиликларга дуч келади. Жеррй Закернинг мазкур ижод маҳсули комедия, мелодрама ва мистик триллерни мужассам қилгани билан ўзига хос.

«Қалб» (Soul)

Pixar студияси томонидан тақдим қилинган «Қалб» номли мультфильм илк марта 2020 йил 11 октябрда экран юзини кўрган. Сюжетга кўра, ҳеч ҳам омади чопмаган мусиқачи энди ҳаммаси изига тушаётганда ҳаётдан кўз юмади. Шундан кейин дарҳол Ерга қайтиши керак бўлиб қолади ва бунинг учун ҳамма нарсага тайёр бўлади. Аммо у қаттиқ хоҳлаган орзу ўйлаганидан бошқачароқ бўлиб амалга ошади. Қаҳрамон Ерга ўзининг эмас, мушукнинг танасида қайтади. Мазкур ижод маҳсули «Олтин Глобус»га аллақачон лойиқ деб топилган.

«Икки олам аро» (Just like heaven)

Режиссёри Марк Уотерс бўлган фильм 2005 йил 16 сентябрда экран юзини кўрган. Янги хонадонга кўчиб ўтган қаҳрамон у ерда арвоҳ борлигига гувоҳ бўлади. Қизиғи шундаки, арвоҳнинг тириклигига ишончи комил бўлади. Уларнинг иккиси ўртасида севги учқунлари аланга ола бошлайди.

«Орзулар қаерга етаклайди?» (What dreams may come)

1998 йилда премьераси бўлган фильм режиссёр Винсент Уоард томонидан суратга олинган. Автоҳалокатда вафот этган Крис Нильсен жаннатга тушади. Лекин ўз жонига қасд қилиб, дўзахга тушган севимли аёлисиз ҳеч нима татимайди. Крис ўз ҳаётидаги, тўғрироғи, ўлимидан кейинги энг хавфли сафарга, яъни рафиқасининг руҳини топиш ва қутқаришга отланади.

«Фаришталар шаҳри» (City of angels)

Николас Кейж фильмда одамлар орасида яшайдиган ва уларга тасалли бериб, кўнглини кўтарадиган фариштани гавдалантиради. Мег Райан эса фаришталар сингари бошқалар ҳақида қайғурадиган ва керак бўлса, ўзини шунга бағишлайдиган оддий аёл ролини ижро қилади. Унга лол ва мафтун бўлган Николаснинг қаҳрамони севимли аёли билан бўлиш учун қанотлари ва абадийликдан воз кечади.

«Осмон кутиши мумкин» (Heaven can wait)

Лос-Анжелес жамоасининг футболчиси Жо Пендлтон биргина хатоси билан оламдан кўз юмади. Жоунинг танаси аллақачон куйиб кетгани сабаб унинг руҳи бошқа одамникига ўтказилади. Натижада Пендлтоннинг руҳи бошқа одамнинг — шундан кейин футбол ўйнаш жон-дили бўлган обрўли бадавлат магнат танасида ерга қайтади.