Наманганда Паралимпия ўйинлари ғолиб ва совриндорларига Gentra автомобиллари топширилди

Наманганда Токиода бўлиб ўтган Паралимпия ўйинлари ғолиб ва совриндорлари тақдирланди. Бу ҳақда «Дарё» мухбири Азизбек Абдувалиев хабар бермоқда.

Мазкур ўйинларда Наманган вакиллари муносиб иштирок этди. Улар томонидан иккита олтин, битта кумуш ва битта бронза медали қўлга киритилди.

Жумладан, Наманган шаҳри вакили Феруз Сайидов пара дзюдо бўйича 73 килограмм вазн тоифасида олтин медал соҳибига айланган бўлса, чустлик Нозимахон Қаюмовага пара енгил атлетиканинг найза улоқтириш турида тенг келадиган топилмади.

Мингбулоқлик Нурхон Қурбонова найза улоқтиришда кумуш, ядро улоқтириш бўйича эса бронза медалига сазовор бўлди. Қолаверса, жаҳон рекордини янгилади.

Тадбирда вилоят ҳокими Шавкат Абдураззақов ҳамда маҳалла ва оилани қўллаб-қувватлаш вазири ўринбосари Содиқжон Турдиев томонидан ғолиб ва совриндор спортчиларга Gentra автомобиллари топширилди.

Маълумот учун, олдинроқ Президент фармони билан Феруз Сайидов «Ўзбекистон ифтихори», Нозима Қаюмова ва Нурхон Қурбонова эса «Ўзбекистон Республикасида хизмат кўрсатган спортчи» унвонлари билан тақдирланганди.

Аввалроқ Паралимпия ўйинлари совриндорлари бўлган ўзбекистонлик спортчиларга Президент совғаси сифатида автомобиль ва Тошкент шаҳридан уйлар топширилганди, Андижон вилояти ҳокими Паралимпия ўйинлари олтин медали совриндори Бобур Омоновга Андижон шаҳридан 2-хонали хонадон совға қилган, Қашқадарё вилоятида  Паралимпия ўйинларида вилоят шаънини ҳимоя қилган Олимпиаданинг кумуш медали совриндорларига Gentra автомобиллари топширилганди, Самарқанд ҳокими эса Олимпия ва Паралимпия ўйинлари совриндорларига уй совға қилганди.