Ижтимоий тармоқларда Фарғона вилоятининг Сўх туманидаги Ҳазрат Али зиёратгоҳидан хум ичида тилла тангалар топилгани ҳақида хабарлар тарқалди. Хабарда айтилишича, 2021 йилнинг 8 сентябрь куни туманнинг «Ҳазрат Али» маҳалла фуқаролар йиғинида жойлашган Ҳазрат Али зиёратгоҳида жойлашган эски ҳовуз ҳашар йўли билан таъмирлаш ишлари амалга оширилган. Таъмирлаш жараёнида ичида олтин тангалари бор хум топилган. Хумдаги тилла тангаларнинг умумий оғирлиги тахминан 1 килограмм атрофида бўлган.
«Дарё» мухбири мазкур маълумотга ойдинлик киритиш мақсадида Сўх тумани ҳокимлиги билан боғланди. Туман ҳокимлиги ахборот хизмати раҳбари Анвар Жўраевнинг маълум қилишича, қадимий зиёратгоҳдан тилла тангалар топилгани ҳақида расмий маълумот мавжуд эмас.
«Ижтимоий тармоқларда ва интернет нашрларида Ҳазрат Али зиёратгоҳидан ичида тилла тангалар бўлган хум топилгани ҳақидаги хабарларни эшитиб, маҳалла раиси билан гаплашдим. Қадимий зиёратгоҳдан ҳеч қандай қадимий буюм ёки тилла танга топилмаган экан», — дейди Анвар Жўраев.
«Ҳазрат Али» маҳалла фуқаролар йиғини раиси, туман кенгаши депутати Субҳонали Нишонов ҳам қадимий зиёратгоҳдаги ҳовузни таъмирлаш вақтида хум ичида тилла тангалар топилгани ҳақидаги маълумотларни рад этди.
Изоҳ (0)