Қўқондаги муаммоларни ёритиб борувчи блогер Иқбол Комилжонов оғир аҳволда шифохонага ётқизилиб, вафот этгани ҳақида хабар берилган эди. Бош прокуратура ахборот хизмати раҳбари Ҳаёт Шамсутдинов марҳумнинг ўлими сабабларини аниқлаш юзасидан суд-тиббий экспертизаси тайинланганини маълум қилди.
Эслатиб ўтамиз, Иқбол Комилжонов 15 сентябрь куни вафот этганди. У Қўқон шаҳридаги муаммоларни ёритиб борувчи Facebook’даги «Қўқонжоним» гуруҳининг асосий муаллифларидан бири ҳисобланган. Блогер коммунал соҳа, соғлиқни сақлаш ва халқ таълими тизимидаги муаммолар ёритилган кескин танқидий чиқишлари билан танилган.
Фарғона вилояти Соғлиқни сақлаш бошқармаси бошлиғи Ҳусан Мамажоновнинг маълум қилишича, у қорин соҳасида оғриқ пайдо бўлиб, соғлиғида муаммолар кузатилгач, 2021 йилнинг 7 сентябрь куни даволаниш мақсадида вилоят кўп тармоқли тиббиёт марказига мурожаат қилган. Унга ҳамроҳлик қилган яқинларининг таъкидлашича, дастлаб беморнинг овқатдан заҳарлангани тахмин қилинган. Бироқ кейинчалик шифокорлар беморда заҳарланиш аломатлари кузатилмаганини айтган.
«Иқболжонни ўша куни касалхонага ўғли ва жияни билан бирга олиб бордим. Қорин соҳаси ва ичакларида кучли оғриқ борлигини айтди. Лекин ҳуши жойида эди. Қўқондан ўзи келди. Касалхонага ҳам ўзи юриб борди. Мен уни шифохонага жойлаштириб, уйга кетдим. Кечаси аҳволи оғирлашиб қолгани учун реанимацияга олишган.
Эртасига заҳарланишга ўхшаяпти, дейишди. Кейинги куни эса шифокор чиқиб, укам коронавирус бўлганини, сатурацияси 60 га тушиб кетганини айтди. Лекин ўша куни топширган таҳлилларида коронавирус аниқланмади. Шифохонага олиб келганимизда ҳам укамда на йўтал, на иситма, на оғриқ бор эди. COVID-19 ёки пневмониянинг бирорта белгиси йўқ эди. Шифокорлар беморда қандли диабет ва бошқа сурункали касалликлари борлиги учун аҳволи бирданига оғирлашиб қолганини айтишяпти. Иқболжон бир-икки ой илгари коронавирусга чалинганди. Лекин касаллик жуда енгил ўтганди. Шифохонада жой йўқлиги учун уйда даволанганди.
Бир ҳафта олдин Фарғонага келиб, мукофот олиб кетди. Икки кун аввал ҳам кайфияти, саломатлиги жуда яхши эди. Ҳайронман, соппа-соғ юрган одам нега бирданига оғирлашиб қолди?», — дея «Дарё»га маълум қилган блогернинг опаси Шоира Комилжонова.
Иқбол Комилжоновнинг опаси Хуршида Зокированинг маълум қилишича, блогерга коронавирус асоратлари, икки томонлама пневмония ташхиси қўйилган. Бемор яқинларининг тиббий экспертиза тайинлаш ҳақидаги сўровлари шифокорлар томонидан рад этилган.
«Укамнинг ҳолатини кўриб, заҳарланган бўлиши мумкинлигини тахмин қилдик. Шифокорларга бизда шунақа шубҳа бор, экспертиза қилиб беринглар, дедик. Улар беморда заҳарланиш белгилари йўқ, экспертиза қилиш шарт эмас, дейишди. Бугун вилоят токсикология бўлими бошлиғи келган экан. Ундан укам заҳарланган бўлиши мумкинми, экспертиза қилдирсак, аниқлаб берадими, деб сўрадик. У экспертиза орқали бемордаги заҳарли моддаларни аниқлаш мумкинлигини айтди. Лекин бу ердаги шифокорлар энди фойдаси йўқ, орадан 4 кун ўтди, осма уколлар қилинди, барибир қондан ювилиб кетган бўлади, дейишяпти. Шунақа экан, нимага келган кунимиз экспертизага рухсат беришмади?», — дейди Хуршида Зокирова.
Шифокорларнинг таъкидлашича, бемор кўп йиллардан буён қандли диабет билан курашиб келган. Шунингдек, коронавирус инфекциясига чалингач, беморда турли сурункали касалликлар авж олган. У шифохонага ичаклардаги муаммо билан мурожаат қилган.
Фарғона вилоят кўп тармоқли тиббиёт маркази бош шифокори Одил Умаровнинг маълум қилишича, блогернинг саломатлиги билан боғлиқ ижтимоий тармоқларда тарқалаётган хабарлар мутлақо асоссиз. Беморда заҳарланиш аломатлари мавжуд бўлмаган.
«Беморнинг яқинлари заҳарланмаганми, деган масалани қўйяпти. Экспертиза ўтказиб беринглар, дейишяпти. Беморда қандли диабет хасталиги бўлган. Қолаверса, у яқинда коронавирус бўлган экан. Инфекция ўпкага ўтиб, икки томонлама пневмония ривожланган. Танадаги барча хасталиклар бирлашиб, бош мияга ишемия берган. Бу бош мия қон айланишининг ўткир бузилишини келтириб чиқаради.
Тананинг баъзи аъзоларида чириш бошланган. Ана шу чиришнинг орқасидан заҳар чиққан. Яъни касаллик организмни заҳарлаяпти. Бу ички заҳарланиш, у ташқаридан тушмаган», — дейди марказ шифокори Элмурод Йўлчиев.
Бош прокуратура ахборот хизмати раҳбари айни пайтда унинг вафот этганлиги ҳолати юзасидан Фарғона шаҳар прокуратураси томонидан терговга қадар текширув олиб борилаётганини билдирди.
Изоҳ (0)