Андижон шаҳридаги 13- ва 24-умумтаълим мактабларида корейс тилини ўқитишга ихтисослаштирилган махсус синфлар ташкил этилди. Бу ҳақда «Дарё» мухбири хабар бермоқда.
Вилоят халқ таълими бошқармаси ахборот хизматининг қўшимча қилишича, янги ўқув йилидан бошлаб халқ таълими бошқармаси ҳамда Ўзбекистон—Корея университети ўртасида тузилган ҳамкорлик меморандумига асосан Андижон шаҳридаги 13- ва 24-умумтаълим мактабларида махсус синфлар ташкил этилиб, Кореянинг етук профессорлари тажриба тариқасида дарс беришни бошлаган.
Очилиш маросимида иштирок этган университет ректори Пак Жун Хо вилоят халқ таълими бошқармаси билан ҳамкорликда ўтказилган фан олимпиадалари давомида андижонлик ёшларнинг билим салоҳияти юқори эканлиги аниқланганини қайд этган.
Қўшимча қилинишича, келгусида Ўзбекистон Президентининг 2021 йил 19 майдаги «Ўзбекистон Республикасида хорижий тилларни ўрганишни оммалаштириш фаолиятини сифат жиҳатдан янги босқичга олиб чиқиш чора-тадбирлари тўғрисида»ги қарори ижросини таъминлаш мақсадида Андижон шаҳрида барча моддий-техник база билан таъминланган, корейс тилини ўқитишга ихтисослаштирилган мактаб ташкил этиш режалаштирилган.
Изоҳ (0)