Ижтимоий тармоқларда Андижон шаҳар ҳокими Баҳром Ҳайдаровнинг ҳуқуқини талаб қилган фуқарони қаматиш билан таҳдид қилгани ҳақида видеоёзувлар тарқалди. Унда ҳокимнинг «Бир нарсани айтяпман, Фаррух, сиздан илтимос, ана шуни тугатиб юборайлик. Ким агар ўша ерга қарши чиқса, қаматаман. Ким бўлишидан қатъи назар», — деганини эшитиш мумкин.
Ҳокимнинг ушбу сўзларига жавобан аёллардан бири «Кимни қаматасиз? У ерда мен борман-да, қаршилик қиладиган? Нимага қаршилик қилсам, қаматасиз? Менинг уйим бор, хусусий мулким бор. Қонуний оралиқ масофа, шаҳарсозлик нормаси, суднинг қарори бор. Қарор гапиради. Суд қарорига ҳамма бўйсунади. Президент қонун чиқариб қўйганми, қўйган. ‘Снос’ ташқарида турмаяпти. Лойиҳага тушиб қоляптими, қоляпти. Мен ҳам эртага Sulton House’га қароримни ўтказаман, қонуний гаплашаман», — дея тортишади.Андижон шаҳар ҳокимлиги ушбу видео юзасидан расмий муносабат билдирди.
Унда шаҳар ҳокимининг Алишер Навоий шоҳкўчаси 63-уйда аҳолига қулай шарт-шароитлар яратиш мақсадида замонавий лойиҳалар асосида қурилиш ишларини амалга оширишга рухсат бериши тўғрисидаги қарори қабул қилингани таъкидланган.
«Бузилиш ишлари давомида ҳар бир хонадон билан келишувларга эришилиб, мавжуд маънан эскирган турар жойларни бузиб, ўрнида замонавий лойиҳалар асосида 12 қаватли турар жой иншоотлари қурилиши белгиланган. Бироқ шу уйда яшовчи фуқаро М.Шафиева пудратчи ташкилот мутасадди раҳбарлари билан келишувга эришмаган ҳолда, доимий равишда қурилиш ишларига тўсқинлик қилиб келган. Бундан ташқари, М.Шафиевага қурилиш ишлари кетаётган пайтда бошқа манзилда вақтинчалик яшаб туриши учун ижара пуллари ҳам тўлаб берилган. Шунга қарамасдан, фуқаро ушбу қурилиш объекти ҳудудидаги уйини бўшатмасдан, уйининг таъмири учун пуллар ундириб келган. Шунингдек, у пул ундириш мақсадида қурилишда ишлаш учун келган транспорт воситалари йўлига ўзини ташлаб, таҳдид қилишда давом этган ва ‘Файзли шинам қурилиш’ МЧЖнинг ўз мажбуриятларини бажаролмаслигига сабаб бўлган», — дейилади ҳокимлик расмий муносабатида.
Қайд қилинишича, Халқ депутатлари Андижон шаҳар кенгаши депутатлари ҳам қурилиш жараёнини ўрганиб, қурилиш ишларини якунига етказиш учун қурувчига бир неча бор муддат ҳам берган. Аммо иш якунига етмаган. Шундан сўнг депутатлар томонидан ушбу қурилиш ишларини тез орада якунлаш ва фуқароларнинг эътирозларини бартараф этиш мақсадида кенгашнинг навбатдаги сессиясида қурилиш ишларини якунлаш Sulton House МЧЖга юклатилган. Бироқ фуқаронинг қурувчи ишига аралашиб, ишни ортга суриши давом этган.
Ҳокимлик ҳокимнинг «Ким ушбу ишни қилса, қамалади» жумласини изоҳлар экан, «ҳоким фуқаролардан олдин ҳам пул олиниб, қурилиш ишларини тўхтатиб қўйган қурувчи ҳаракатига шаҳар ИИБ томонидан ҳуқуқий баҳо берилиши учун суриштирув ишлари давом этаётганини назарда тутиб, келгусида бу каби ҳолат такрорланса, қамоқ билан боғлиқ эҳтиёт чораси қўлланиши мумкинлиги ҳақида огоҳлантирган», — дейди.
Шунингдек, шаҳар ҳокимлиги била туриб бошқа шахсни шарманда қиладиган уйдирмалар тарқатиш Жиноят кодексида назарда тутилган жавобгарликка сабаб бўлишини эслатган.
Изоҳ (0)