Сурхондарё вилоятининг Шўрчи туманида 160 тупдан ортиқ тут дарахти қўпорилиб, ўрнида қурилиш бошлангани тўғрисида 14 сентябрь куни «Qalampir.uz» сайти маълум қилди. Ҳолат юзасидан «Ўзбекипаксаноат» уюшмаси муносабат билдирди.
Қайд этилишича, 13 сентябрдан 14 сентябрга ўтар кечаси Шўрчи тумани Ободон ҳудуди М41 Бишкек–Душанбе–Термиз халқаро автомобиль йўли ёқасида жойлашган 4 гектарлик тутзордан 160 тупдан ошиқ тут дарахти номаълум шахслар томонидан кесилиб, томири билан қўпориб олинган.
Тут дарахтларининг ўрнида 14 сентябрь эрта тонгдан қурилиш ишлари бошланган. Узунлиги 40 метр, энига 18 метр бўлган йирик бинонинг пойдевори қурилишида 8−10 нафар киши ишлаб турган.
Ҳолат юзасидан ишчи гуруҳ томонидан тегишли тартибда далолатнома тузилиб, «Ўзбекипаксаноат» уюшмасига тақдим этилган. Далолатномага кўра, Шўрчи туман Кадастр агентлиги ушбу ҳудуд ҳақиқатан «Ўзбекипаксаноат» уюшмаси тизимидаги «Шўрчи Тайёрлов Агропилла» МЧЖнинг балансида эканини тасдиқлагани кўрсатилган.
Маълум бўлишича, ушбу ҳудуд қурилиш ишларини бошлаган «Олтин учбурчак» лойиҳаси раҳбари Дилором Ўроловага Шўрчи тумани ҳокимининг 8 апрелдаги қарори билан автобус бекати ва санитария–гигеник (маиший хизмат кўрсатиш) шохобчаси қуриш учун ажратиб берилган.
Қарорда Ободон ҳудудидаги тутзор майдони Шўрчи тумани ҳокимлиги балансига «Шўрчи Тайёрлов Агропилла» МЧЖнинг 29 мартдаги хатига асосан қайтарилгани кўрсатилган. Аниқланишича, компания томонидан ушбу тутзорнинг Шўрчи тумани ҳокимлиги балансига қайтарилиши тўғрисида ҳеч қандай хат чиқарилмаган.
Ишчи гуруҳининг ўрганиш хулосалари асосида Шўрчи тумани прокурорига билдириш хати билан чиқилган ва ҳудудда қурилиш ишлари тўлиқ тўхтатилгани айтилди.
Қайд этилишича, «Ўзбекипаксаноат» уюшмаси олинган хулосалар асосида ушбу ноқонуний қилинган хатти-ҳаракатлар юзасидан суриштирув олиб бориш ва ушбу жиноятнинг асл сабабчиларини аниқлаш мақсадида 14 сентябрь куни Бош прокуратура ҳамда Экология ва атроф-муҳитни муҳофаза қилиш давлат қўмитасига хат киритган.
Изоҳ (0)