Қозоғистон парламенти депутатлари бола ҳуқуқларини ҳимоя қилиш бўйича қонун лойиҳасини биринчи ўқишда маъқуллади, ҳужжатда мамлакатда рўйхатдан ўтишни истамаган ижтимоий тармоқлар ва мессенжерлар фаолиятига нисбатан чекловлар жорий қилиш меъёрлари белгиланган. Бу ҳақда “Zakon.kz” хабар берди.
Қонун лойиҳасининг хулосавий қисмида ҳужжатни ишлаб чиқишда болаларнинг яшаш ҳуқуқи, шунингдек, оилавий муносабатлардаги ҳуқуқи ва қонунга зид контентга нисбатан профилактика масалалари каби алоҳида меъёрлар ҳисобга олинган.
Депутатлар «Ахборотлаштириш тўғрисидаги» қонуннинг 1-моддасини 73 ва 74-бандлар билан тўлдириш зарурлиги, уларда онлайн-платформа, интернет-ресурс, тезкор хабарномалар алмашинуви сервиси каби тушунчаларга таъриф киритилишини таклиф қилган.
Яна бир ўзгартириш Қозоғистон ҳудудида фаолият олиб боришнинг аниқ қоидаларини жорий қилишга қаратилган. Мамлакатда ўз фаолиятини олиб бориши учун хориж онлайн-платформалари ёки тезкор хабарномалар алмашинуви сервиси эгалари мажбурий тартибда давлат рўйхатидан ўтказилиши ва Қозоғистонда расмий ваколатхонасини очиши шарт.
Ахборот ва жамоатчиликни ривожлантириш вазирининг ўринбосари Кемелбек Ойшибаев вазирликнинг депутатлар киритаётган ўзгаришларни қўллаб-қувватлашини билдирган.
«Қонун лойиҳасида ижтимоий тармоқлар ва мессенжерлар учун меъёрлар белгиланган ва биз уни қўллаб-қувватлаймиз. Сабаби ахборот маконини таҳлил қилган вақтимизда катта миқдордаги кибербуллинг ҳолатлари кузтаилаётганини кўрганмиз. Вазирликка бу борада жуда кўп мурожаатлар келиб тушган», — дейди Ойшибаев.
Вазир ўринбосарининг сўзларига кўра, 2020 йилдаги мониторинглар давомида тармоқда 70 мингга яқин кибербуллинг ҳолатлари кузатилган. Шундан кейин ижтимоий тармоқлар ва мессенжерлар администрацияларига бу каби материалларни ўчириш юзасидан 1800 га яқин мурожаат юборилган. Аммо шунга қарамай 2021 йилда ушбу рақамлар яна кўпайди ва 140 мингтага етди.
«Афсуски ҳамма ижтимоий тармоқлар ва мессенжерлар ҳам мурожаатимизга жавоб қайтармайди. Айрим ижтимоий тармоқлар тезда муносабат билдириб материалларни ўчириб ташласа, айримлар 20-30 фоиз мурожаатларга эътибор қаратади. Шу сабабли ижтимоий тармоқ ва мессенжер учун қонуний тушунча ҳамда меъёрлар жорий қилинишини таклиф этдик», — деган вазир ўринбосари.
Ўзбекистонда 2021 йил 14 январь куни «Шахсга доир маълумотлар тўғрисида»ги қонунга қўшимчалар киритиш тўғрисидаги қонун Президент томонидан имзоланган ва апрель ойидан бошлаб кучга кирган. Май ойи охирида «Ўзкомназорат» давлат инспекцияси «Mail.ru Group», Twitter ва Tencent компанияларига серверларини Ўзбекистонга кўчириш бўйича кўрсатмалар берган. Июль ойида Ўзбекистон қонунига зид равишда фаолият юритаётган айрим ижтимоий тармоқлардан фойдаланиш мамлакат ҳудудида чекланган. Кейинчалик Ўзбекистонда шахсга доир маълумотлар субъектлари ҳуқуқларини бузувчилар реестридан Twitter, TikTok, «ВКонтакте», Skype ва WeChat ўрин олгани маълум бўлди.
Изоҳ (0)