АҚШ президенти Жо Байден Хитой раиси Си Цзиньпинни юзма-юз учрашувга таклиф қилди, лекин Си Цзиньпин таклифни рад этди. Бу ҳақда икки давлат раҳбарларининг телефондаги суҳбати мазмуни билан таниш манбаларга таяниб, Financial Times хабар берди.
Давлат раҳбарлари ўтган ҳафта телефон орқали бир ярим соатлик мулоқот ўтказган, суҳбатда Байден хитойлик ҳамкасбини юзма-юз учрашишга таклиф қилган. Нашрнинг ёзишича, Америка раҳбари АҚШ ва Хитой ўртасидаги муносабатларни «боши берк кўчадан чиқариш»га уриниб кўриш ниятида бўлган. Бироқ, манбаларга кўра, ХХР раиси таклифни қабул қилиш ўрнига Вашингтон Пекин билан муносабатларда ўз оҳангини ўзгартириши кераклигини талаб қилган.
Байден Пекиннинг Гонконг ва Тайванга нисбатан сиёсати ҳамда уйғурларга зулми туфайли Хитойга қарши кескин позицияни эгаллаган, деб ёзади Financial Times. Бунга жавобан Пекин АҚШ президенти маъмуриятини мамлакатнинг ички ишларига аралашишда айблаган.
Аммо кейинроқ Байденнинг ўзи Си Цзиньпин у билан учрашишдан бош тортгани ҳақидаги хабарни рад этди.
«АҚШ президенти Жо Байден 14 сентябрь куни журналистларга ўтган ҳафта телефон орқали мулоқотда Си Цзиньпинни шахсий саммит ўтказишга таклиф қилганида у рад этгани ҳақидаги хабарлар ҳақиқатга тўғри келмаслигини айтди», — деб ёзади Reuters. Президентнинг ушбу мавзу бўйича нутқи ҳали Оқ уй сайтида эълон қилинмаган.
Аввалроқ АҚШ президентининг миллий хавфсизлик бўйича маслаҳатчиси Жейк Салливан ҳам Financial Times маълумотларини ҳақиқатга тўғри келмаслигини айтган. «Бу телефон суҳбатининг нотўғри тавсифи. Тамом», — деди Салливан.
Financial Times’да чиққан ушбу хабар муаллифи Деметри Севастопуло Twitter’да ёзишича, нашр «ўз версиясида қатъий туради».
Изоҳ (0)