Ўзбекистоннинг 4 та ҳудудида 1–25 ноябрь кунлари синов тариқасида аҳолини рўйхатга олиш тадбири ўтказилади. Бу ҳақда АОКАда Давлат статистика қўмитаси раиси ўринбосари Зоҳиджон Зияев, бошқарма бошлиғи Қобил Бердиқулов, Кадрлар малакасини ошириш ва статистик тадқиқотлар институти директори Баҳодир Ғойибназаров иштирокида ўтказилган матбуот анжуманида маълум қилинди.
Аҳолини рўйхатга олиш бу — мамлакат аҳолисининг муайян вақтдаги «фотосурати»ни олиш имконини берувчи умумдавлат миқёсидаги кенг кўламли тадбир бўлиб, аҳоли тўғрисидаги ишончли ахборот манбаси ҳисобланади.
Аҳолини рўйхатга олишда ҳар бир фуқаронинг маълумотлари муҳим аҳамиятга эга бўлиб, аввало, аҳолининг аниқ сони, ёши, жинси, фуқаролиги, миллий таркиби, оилавий аҳволи, маълумоти, уй-жой билан таъминланганлик даражаси, бандлиги, даромад манбалари каби кўрсаткичлар бўйича батафсил маълумот тўпланади.
Қайд этилишича, синов тариқасида аҳолини рўйхатга олишдан мақсад — аҳолини рўйхатга олиш учун ишлаб чиқилган услубий қўлланмалар, сўровнома шаклидаги саволлар, ташкилий ишлар, дастурий таъминот ва технологияларни синовдан ўтказиш.
Таъкидланишича, синов жараёнларида аниқланган барча хато ва камчиликларни бартараф этиш юзасидан тегишли чоралар кўрилади. Шунинг учун ҳам синов тариқасида аҳолини рўйхатга олиш ишлари асосий тадбирдан камида икки йил олдин ўтказилади.
Мазкур ишлар учун жами 175 нафар (Хўжаобод туманида 35 нафар, Юқори Чирчиқ туманида 37 нафар, Хива шаҳрида 22 нафар ва Яшнобод туманида 81 нафар) регистраторлар статистика, кадастр, маҳалла ва уй-жой фондидан фойдаланувчи ташкилотлар ходимлари орасидан ҳудудий комиссиялар томонидан танлаб олинган.
Танлаб олинган регистраторлар 2021 йилнинг 28–30 апрель кунлари Давлат статистика қўмитаси мутахассислари томонидан махсус дастур асосида ўқитилиб, танланма равишда маҳаллаларга чиққан ҳолда уларнинг амалий кўникмалари оширилди.
Ҳозирги кунда 4 та ҳудуд бўйича ишлаб чиқилган ташкилий режага мувофиқ, маҳаллаларда аҳолини рўйхатга олиш жараёнларини ташкил этиш ва назорат қилишга мўлжалланган рўйхатга олиш участкалари ташкил этилмоқда. Жами бўлиб 100 та, шундан, Хўжаобод туманида 11 та, Юқори Чирчиқ туманида 13 та, Хива шаҳрида 7 та ва Яшнобод туманида 19 та рўйхатга олиш участкалари ташкил этилмоқда.
Шунингдек, ҳар 5 нафар рўйхатга олувчи ишини назорат қилиб борувчи инструкторлик участкалари ташкил этилмоқда. Булар, Хўжаобод туманида 56 та, Юқори Чирчиқ туманида 68 та, Хива шаҳрида 36 та ва Яшнобод туманида 94 тани ташкил этади.
Мазкур участкалар учун маҳаллий ҳокимликлар томонидан зарур воситалар билан жиҳозланган бино ёки хоналар ажратилади.
Изоҳ (0)