Ўзбекистонда электромобиллар автотранспорт йиғимидан озод этилди, деб хабар бермоқда Spot. Бу 14 сентябрь куни Шавкат Мирзиёев томонидан имзоланган қонунда белгиланди.
Қонунга кўра, Солиқ кодексининг транспорт йиғимини тўлашдан озод қилинувчи ҳолатлар назарда тутилган 459-моддаси қуйидаги банд билан тўлдирилмоқда:
«Фақат электр двигатель орқали ҳаракатга келтириладиган автомототранспорт воситаларини сотиб олувчи ва (ёки) уларни Ўзбекистон Республикаси ҳудудига вақтинча олиб киришни амалга оширувчи шахслар».
Ўзбекистонда электромобиллар тобора кенг тарқалмоқда. Давлат статистика қўмитаси маълумотларига кўра, июль ойининг ўзида мамлакатга 164 дона электромобил келтирилди.
Ўзбекистон ҳукуматининг 2020 йил 29 декабрдаги қарорида «Ўзавтосаноат»ни фақат электродвигателда ҳаракатланувчи енгил автомобиллар ва мототранспорт воситалари ишлаб чиқаришга ўтказиш мақсади ошкор этилган эди.
«Ўзавтосаноат» компаниясининг Стратегия бўлими бошлиғи Рустам Қодиров 2021 йилнинг март ойида UzAuto Motors’нинг Асака шаҳрида ташкил этилган матбуот анжуманида Ўзбекистонда ҳозирги вақтда электромобилларни ишлаб чиқариш учун зарур инфратузилма йўқлигини айтганди.
Изоҳ (0)