Facebook ижтимоий тармоғида Тошкент шаҳрининг Юнусобод туманидаги 250-сонли умумтаълим мактабида рўмол ўраган қизлар дарсга киритилмагани ҳақида хабар тарқалди. Тошкент Халқ таълими бош бошқармаси ҳолат юзасидан муносабат билдирди.
Қайд этилишича, тарқалган хабар юзасидан туман халқ таълими бўлими ишчи гуруҳи ўрганиш олиб борган. Унга кўра, хабарда келтирилган маълумотлар ўз исботини топмаган. Бундан ташқари, тарқатилган маълумот ва фотолавҳаларнинг таълим муассасаси ўқувчи-қизларига мутлақо алоқаси йўқлиги аниқланган.
Таъкидланишича, туманда халқ таълими бўлими тасарруфидаги 42 та умумтаълим мактаби мавжуд. Уларда жами 60 489 ўқувчи, жумладан, 28 578 нафар қиз таҳсил олади. Барча мактабларда 6 сентябрдан янги ўқув йили бошланган.
4 сентябрь куни халқ таълими вазири Шерзод Шерматов томонидан педагог-ходим, ота-оналар ва кенг жамоатчилик вакиллари учун онлайн шаклда очиқ мулоқот ўтказилган. Мулоқот давомида вазир янги ўқув йилига тайёргарлик кўриш, ўқувчиларнинг кийиниш маданиятига қўйиладиган талаблар ва бошқа қатор масалалар ҳақида сўз юритган.
Мулоқотда ота-оналарнинг таклиф ва мулоҳазалари асосида рўмол ўраган қизлар учун миллий қадриятларни инобатга олган ҳолда истисно тариқасида мактабда оқ ва очиқ рангларда миллий рўмол ва дўппида бўлишга рухсат этилишини маълум қилган. Бошқармага кўра, бугунги кунда таълим муассасаларида рўмол ўраган қизларнинг рўмолини мажбурлаб ечишга йўл қўйилмаяпти.
Бундан аввал Ўзбекистонда ўқувчи қизларнинг мактабга рўмол ўраб келишига рухсат берилганди.
Изоҳ (0)