Rossiyaning Irkutsk viloyati gubernatori Igor Kobzev Kazachinskoye qishlog‘i yaqinida L-410 samolyoti qulashi oqibatida halok bo‘lganlar uchun 15-sentabrni motam kuni deb e’lon qildi. Bu haqda viloyat huquqiy axborot rasmiy internet-portaliga tayanib, Anadolu Agency xabar berdi.
“2021-yil 12-sentabr kuni ‘SiLA’ aviakompaniyasining L-410 samolyoti bilan sodir bo‘lgan halokat qurbonlar uchun qayg‘u, ularning oila a’zolari va yaqinlariga hamdardlik bildirgan holda, Irkutsk viloyati nizomining 59-moddasiga binoan men 2021-yil 15 sentabrni Irkutsk viloyati hududida motam kuni deb e’lon qilishga qaror qildim”, — deyiladi hujjatda.
Shuningdek, gubernator qurbonlar va jarohatlanganlarning oilalariga tovon puli to‘lanishini ma’lum qilgan: qurbonlarning har biri uchun 1 million rubldan, og‘ir ahvoldagilar uchun 500 ming rubldan, o‘rtacha og‘irlikdagi bemorlar uchun 250 ming rubldan, yengil jarohat olganlar uchun 100 ming rubldan to‘lab beriladi.
12-sentabr, yakshanba kuni Irkutskdan muntazam parvozni amalga oshirayotgan L-410 yo‘lovchi samolyoti Kazachinskoye qishlog‘idan 4 km uzoqlikda qo‘nish paytida qulab tushgan. To‘rt kishi, shu jumladan, uchuvchi halok bo‘lgan.
12 kishi kasalxonaga yotqizilgan. To‘rt nafar jabrlanuvchining ahvoli og‘ir, qolganlari shifokorlar nazorati ostida. Yo‘lovchilardan biri tibbiy ko‘rikdan so‘ng shifoxonani tark etdi.
“SiLA” aviakompaniyasi vakiliga ko‘ra, bortida 16 kishi bo‘lgan samolyot qo‘nishga qayta uringanda qulab tushgan. Falokat oqibatlarini bartaraf etish bo‘yicha tezkor shtab voqea texnik nosozlik tufayli sodir bo‘lgan deb hisoblamoqda.
Aviakompaniyaning “RIA Novosti”ga ma‘lum qilishicha, L-410 samolyotining qulashiga uskunalarning ishlamay qolgani va tumanda ko‘rish darajasining yomonlashgani sabab bo‘lgan bo‘lishi mumkin.
Tergov qo‘mitasi harakat xavfsizligi va havo transportidan foydalanish qoidalarini buzish (Jinoyat kodeksining 263-moddasi) moddasi bo‘yicha jinoiy ish qo‘zg‘atdi. Ushbu modda bo‘yicha aybdor deb topilganlar besh yilgacha ozodlikdan mahrum qilinishi mumkin.
Bundan bir oy avval, 12-avgust kuni Rossiyaning Kamchatka o‘lkasida sayyohlarni olib ketayotgan Mi-8 vertolyoti ko‘lga qulab tushgandi. Mi-8 bortida 16 kishi bo‘lgan, ulardan 8 nafari bedarak yo‘qolgan.
Shuningdek, 6-iyul kuni Rossiyaning Petropavlovsk-Kamchatskiy shahridan Palana posyolkasiga yo‘lovchi parvozini amalga oshirayotgan An-26 samolyoti dengizga qulagan edi. Samolyot bortida 28 kishi bo‘lgan. Halokatdan so‘ng Rossiyada uch kunlik motam e’lon qilingandi. Dastlab qutqaruvchilar samolyot qulab tushishi oqibatida halok bo‘lgan olti kishining jasadini topishga muvaffaq bo‘lgan, ular suvdan chiqarib olingan. 9-iyul kuni An-26 samolyotidagi barcha yo‘lovchilar va ekipaj a’zolarining jasadi topilgan.
Izoh (0)