Ўзбекистондаги афғонистонлик учувчилар АҚШнинг Доҳадаги ҳарбий базасига олиб кетилиши ҳақида хабар берилган эди. Reuters АҚШ афғон учувчиларини Ўзбекистондан олиб чиқиб кетишни бошлаганини, биринчи гуруҳ куни кеча БААга жўнаб кетганини маълум қилди.
Қайд этилишича, бу жараённи бир неча кун давомида бир неча босқичда амалга ошириш режалаштирилган. Аввалроқ Reuters Термиз яқинидаги лагерда яшаётган ушбу учувчилар ватанга қайтишдан қўрқаётганини маълум қилганди.
Афғонистонликлар Ўзбекистонга келган 46 та ҳарбий самолёт, шу жумладан, А-29 енгил штурмчилар ва UH-60 Black Hawk вертолётларининг кейинги тақдири номаълум эди. АҚШнинг амалдаги ва собиқ давлат хизматчилари «Толибон» афғонистонлик ходимлар ва самолётларни Афғонистонга қайтаришни талаб қилиб Ўзбекистонга босим ўтказганини Reuters’га маълум қилган.
АҚШнинг Ўзбекистондаги собиқ элчиси Жон Ҳербст АҚШнинг эвакуация қилиш ҳаракатларини олқишлаб, Қўшма Штатлар афғон учувчилари олдида қарздорлигини билдирган.
«Умид қиламанки, бизда улар олиб чиқиб кетган самолётларни АҚШга қайтариш ва ‘Толибон’ қўлига бериб қўймаслик бўйича режа бор», — деган у.
«Толибон» собиқ ҳарбий хизматчиларни, шу жумладан, учувчиларни ҳам янги хавфсизлик кучларига қўшилишга таклиф қилган ва уларга ҳеч қандай зарар етказилмаслигини маълум қилганди.
Агентлик маълумотларига кўра, бу таклиф Reuters билан суҳбатлашган афғон учувчилари учун сохтадек туюлади. Чунки Афғонистонда толиблар ҳокимиятга келишидан олдин ҳам уларнинг асосий мақсади АҚШда ўқиган инглиз тилида сўзлашувчи учувчилар бўлган. «Толибон» жангарилари уларни кузатиб турган ва базадан чиққан учувчиларнинг бир нечтасини ўлдиришган ҳам.
Аввалроқ лагердаги учувчилардан бири Reuters билан уяли телефон орқали суҳбатда ўзини «эркин ҳаракатланиши қаттиқ чеклаб қўйилган, узоқ вақт қуёш остида қолаётган, озиқ-овқат ва дори-дармонлар етарли бўлмаган ҳолатдаги маҳбус» каби ҳис қилаётганини таъкидлаганди. Унинг сўзларига кўра, бу вақт ичида баъзилар озиб кетган. «Гўёки қамоқхонадамиз. Бу ерда бизда эркинлик йўқ», — деган у.
Изоҳ (0)