AQSh afg‘on uchuvchilarini O‘zbekistondan olib chiqib ketishni boshladi — Reuters
O‘zbekistondagi afg‘onistonlik uchuvchilar AQShning Dohadagi harbiy bazasiga olib ketilishi haqida xabar berilgan edi. Reuters AQSh afg‘on uchuvchilarini O‘zbekistondan olib chiqib ketishni boshlaganini, birinchi guruh kuni kecha BAAga jo‘nab ketganini ma’lum qildi.
Qayd etilishicha, bu jarayonni bir necha kun davomida bir necha bosqichda amalga oshirish rejalashtirilgan. Avvalroq Reuters Termiz yaqinidagi lagerda yashayotgan ushbu uchuvchilar vatanga qaytishdan qo‘rqayotganini ma’lum qilgandi.
Afg‘onistonliklar O‘zbekistonga kelgan 46 ta harbiy samolyot, shu jumladan, A-29 yengil shturmchilar va UH-60 Black Hawk vertolyotlarining keyingi taqdiri noma’lum edi. AQShning amaldagi va sobiq davlat xizmatchilari “Tolibon” afg‘onistonlik xodimlar va samolyotlarni Afg‘onistonga qaytarishni talab qilib O‘zbekistonga bosim o‘tkazganini Reuters’ga ma’lum qilgan.
AQShning O‘zbekistondagi sobiq elchisi Jon Herbst AQShning evakuatsiya qilish harakatlarini olqishlab, Qo‘shma Shtatlar afg‘on uchuvchilari oldida qarzdorligini bildirgan.
“Umid qilamanki, bizda ular olib chiqib ketgan samolyotlarni AQShga qaytarish va ‘Tolibon’ qo‘liga berib qo‘ymaslik bo‘yicha reja bor”, — degan u.
“Tolibon” sobiq harbiy xizmatchilarni, shu jumladan, uchuvchilarni ham yangi xavfsizlik kuchlariga qo‘shilishga taklif qilgan va ularga hech qanday zarar yetkazilmasligini ma’lum qilgandi.
Agentlik ma’lumotlariga ko‘ra, bu taklif Reuters bilan suhbatlashgan afg‘on uchuvchilari uchun soxtadek tuyuladi. Chunki Afg‘onistonda toliblar hokimiyatga kelishidan oldin ham ularning asosiy maqsadi AQShda o‘qigan ingliz tilida so‘zlashuvchi uchuvchilar bo‘lgan. “Tolibon” jangarilari ularni kuzatib turgan va bazadan chiqqan uchuvchilarning bir nechtasini o‘ldirishgan ham.
Avvalroq lagerdagi uchuvchilardan biri Reuters bilan uyali telefon orqali suhbatda o‘zini “erkin harakatlanishi qattiq cheklab qo‘yilgan, uzoq vaqt quyosh ostida qolayotgan, oziq-ovqat va dori-darmonlar yetarli bo‘lmagan holatdagi mahbus” kabi his qilayotganini ta’kidlagandi. Uning so‘zlariga ko‘ra, bu vaqt ichida ba’zilar ozib ketgan. “Go‘yoki qamoqxonadamiz. Bu yerda bizda erkinlik yo‘q”, — degan u.
