Европа Иттифоқи Афғонистон муваққат ҳукумати таркибидан хавотир билдирди. Иттифоқнинг Ташқи ишлар хизмати «Толибон» инклюзив ҳукумат тузиш ҳақидаги ваъдасини бажара олмаган, деб ҳисоблайди.
«Европа Иттифоқи ‘Толибон’нинг 7 сентябрь куни тайинлаган Афғонистон муваққат ҳукуматидан хавотирда. Унинг таркиби Афғонистоннинг сиёсий, диний ва этник хилма-хиллигини акс эттирувчи инклюзив ҳукумат тузиш ҳақида ‘Толибон’ берган ваъдаларга мос келмайди », — дейилади Евроиттифоқ хабарида.
Брюсселнинг фикрича, инклюзив ва вакиллик ҳукумати «барқарор ва тинч Афғонистонни барпо этишнинг асосий элементи», шунингдек, Европа Иттифоқининг Афғонистон билан ҳамкорлигининг асосий мезонидир. Европа Иттифоқи Афғонистон расмийларининг ҳукуматни шакллантириш жараёнида инклюзив ва вакиллик тамойилларига амал қилишига умид қилмоқда.
7 сентябрь куни «Толибон» ҳаракати Афғонистон ҳукуматининг янги таркибини эълон қилди. Ҳаракат матбуот котиби Забиҳулла Мужоҳид Вазирлар Маҳкамасининг аъзолари рўйхатини оммага тақдим қилган, унинг ўзи ҳукуматда маданият ва ахборот вазири лавозимини эгаллайди.
Қайд этилишича, Муҳаммад Ҳасан Оҳунд «Толибон» тузган янги ҳукуматнинг раҳбари бўлади. Оҳунд «Толибон» етакчиларининг раҳбари ҳисобланарди ва аввалги АҚШ ҳомийлигидаги ҳукумат қўшинига қарши урушда гуруҳни бошқарган. Қандаҳорлик етакчи «Толибон» асосчиларидан бири ҳисобланади.
Мулла Абдул Ғани Бародар бош вазир ўринбосари бўлади, у «Толибон»нинг сиёсий қанотига раҳбарлик қилган. «Ҳаққоний тармоғи» гуруҳи асосчисининг ўғли Сирожиддин Ҳаққоний эса ички ишлар вазири лавозимини эгаллайди. «Толибон» асосчиларидан бирининг ўғли Умар Ёқуб мудофаа вазири бўлади. У 2020 йилдан бошлаб «Толибон»нинг деярли барча ҳарбий операцияларига раҳбар бўлган.
Шунингдек, «Толибон» янги ҳукуматда аёллар учун лавозимлар бўлишини ваъда қилди. «Бизда аёллар учун шариат қонунларига мувофиқ лавозимлар бўлади. Улар ҳукумат таркибида ишлай олади», — деди Мужоҳид. Унинг аниқлик киритишича, аввалроқ эълон қилинган ҳукумат таркиби (унда аёллар йўқ) вақтинчалик.
Изоҳ (0)