Россия президенти Владимир Путин ва Беларусь президенти Александр Лукашенко ўртасида тахминан уч ярим соат давом этган музокаралар якунланди. Путиннинг айтишича, иттифоқ давлат доирасида интеграциялашув бўйича 28 та ҳамкорлик дастурининг барчаси мувофиқлаштирилган.
«Бугун мен мамнуният билан шуни таъкидлашни истардимки, барча 28 та дастур мувофиқлаштирилди», — деди Путин музокаралар якунлари бўйича қўшма матбуот анжуманида. Владимир Путиннинг сўзларига кўра, «дастурлар қонунчиликни бирлаштириш тўғрисида, шунингдек, икки мамлакат хўжалик юритувчи субъектлари фаолияти шартларини тенглаштириш, умумий молиявий ва энергетика бозорларини, транспорт майдонини қуриш, ягона саноат ва қишлоқ хўжалиги сиёсатини шакллантириш ва амалга ошириш тўғрисида».
Путиннинг айтишича, дастурлар 10 сентябрь куни тасдиқланади, шундан кейин бу масала кўриб чиқиш учун иттифоқ давлати Олий давлат кенгашига тақдим этилади. Кенгаш йиғилиши йил охиригача ўтказилиши керак.
«Россия ва Беларусь билвосита солиқларни йиғишнинг умумий тамойиллари тўғрисида шартнома имзолаш ниятида», — деди Владимир Путин. Иттифоқ давлати таркибида билвосита солиқларни бошқаришнинг яхлит тизимини жорий этиш режалаштирилмоқда.
«Келгусида ягона пул-кредит сиёсатини шакллантириш, валютани тартибга солиш, миллий тўлов тизимларини интеграциялаш ва умумий тўлов майдонини яратиш бўйича умумий кўрсатмалар аниқланди», — дея қўшимча қилди Россия президенти.
Қайд этилишича, 2022 йилда Беларусь учун газ нархи 2021 йил даражасида қолади. 2023 йил 1 декабрга қадар «ягона газ бозорини яратиш тўғрисидаги ҳужжат имзоланади». Шунингдек, нефть, нефть маҳсулотлари ва электр энергияси учун умумий бозорлар яратилиши мумкин.
«Умид қиламизки, икки мамлакатнинг оддий фуқаролари интеграциядан катта фойда кўради. Руслар ва беларусларга иқтисодий ва ижтимоий соҳаларда тенг ҳуқуқ ва имкониятлар кафолатланади», — дея қўшимча қилди Путин.
Александр Лукашенко матбуот анжуманида икки ҳукумат «улкан ишни амалга оширганини» айтди. «Бугун Владимир Владимирович билан биз учун муҳим бўлган фундаментал қарорларни қабул қилдик», — деди Беларусь президенти.
Лукашенконинг фикрича, интеграция дастурларининг мамлакатлар халқи учун ёмон томони йўқ. «Мухолифатчи деб аталадиганлар (Беларусда) мени ва ҳокимиятни танқид қилиб, шовқин кўтарди... Шунинг учун мен улардан ва Россия билан интеграциямизни танқид қилувчилардан сўрамоқчиман — сиз қаерда Россия Федерациясининг оёғида оғирлик кўряпсиз? », — деди Лукашенко.
Беларусь президенти Александр Лукашенко 9 сентябрь куни ишчи ташриф билан Москвага келганди. У Путин билан Россия ва Беларусь бирлашуви режасини тасдиқламоқчи экани хабар қилинганди.
Россия ва Беларусь расмийлари 1999 йилдан бери икки давлатнинг сиёсий интеграциясини муҳокама қилиб келади. 2019—2020 йилларда иқтисодиёт ва бошқарувнинг турли соҳаларида бирлашувни ўз ичига олган 31 та йўл харитаси атрофида музокаралар ўтказилган. Йўл хариталари лойиҳалари бирор марта чоп этилмаган. Аввалроқ Беларусь аҳолиси мамлакатнинг Россия билан интеграциясига қарши чиққан эди.
Изоҳ (0)