Пекин ва Вашингтон ўртасидаги зиддият нафақат икки давлатга, балки бутун дунёга хавф туғдириши мумкин. Бу ҳақда ХХР раиси Си Цзиньпин 10 сентябрь куни АҚШ президенти Жо Байден билан телефон орқали мулоқотда айтиб ўтди.
«Хитой—АҚШ ҳамкорлиги ҳар икки томонга ҳамда бутун дунёга фойда келтиради. Хитой ва АҚШ қарама-қаршилиги иккала мамлакатга ҳам, бутун дунёга ҳам хавф солади», — дея Си Цзиньпиннинг сўзларини келтирган Хитой марказий телевидениеси.
«Қўшма Штатларнинг Хитойга нисбатан сиёсати бир мунча вақт Хитой—Америка муносабатларида жиддий қийинчиликларга олиб келди. Бу икки мамлакат халқларининг асосий манфаатларига ҳам, дунё давлатларининг умумий манфаатларига ҳам мос келмайди», — қўшимча қилди Си Цзиньпин.
Унинг таъкидлашича, нафақат икки мамлакат, балки бутун дунё тақдири Хитой ва АҚШнинг ўзаро муносабатларни яхшилай олиш-олмаслигига боғлиқ. «Бу аср саволидир, унга иккала давлат ҳам жавоб бериши шарт», — деди Си Цзиньпин. Унинг сўзларига кўра, Пекин ва Вашингтон сиёсий ирода ва масъулиятни намоён этиб, муносабатларини нормал ривожланиш йўлига тезроқ қайтариши зарур.
Шунингдек, Си Цзиньпин маълум қилишича, Пекин иқлим ўзгариши ва коронавирус пандемиясига қарши курашда, шунингдек, иқтисодий тикланиш ва жаҳон муаммоларини ҳал қилишда Вашингтон билан мулоқот қилишга ва бирга ишлашга тайёр.
ХХР раиси америкалик ҳамкасбига Пекин экологик муаммоларни биринчи ўринга қўйишга, «яшил йўл»ни излашга ва чиқиндиларни камайтиришга қатъий қарор қилганини тушунтирди. Си Цзиньпин таъкидлашича, бу борада ХХР ўз миллий шартларига мувофиқ халқаро мажбуриятларни зиммасига олади.
Февраль ойида Си Цзиньпин АҚШ ва Хитой ўртасидаги зиддиятни бутун дунё учун ҳалокат деб атаганди. Ўшанда у икки мамлакат музокараларни қайта бошлаши зарурлигини айтган.
Ўз навбатида, АҚШ давлат котиби Энтони Блинкен Хитой билан муносабатларни АҚШ учун энг муҳим деб атаган.
Изоҳ (0)