Германия канцлери Ангела Меркель 7 сентябрь куни Бундестагнинг ялпи мажлисида нутқ сўзлади, бу унинг бўлажак парламент сайловлари олдидан сўнгги нутқи. Учрашув маҳаллий телеканаллар томонидан трансляция қилинган, деб ёзади «ТАСС».
Меркелнинг нутқи 14 дақиқа давом этди. Канцлер иқлим ўзгаришига қарши кураш, «яшил» энергияни ривожлантириш, терроризм ва кибержиноятларга қарши кураш ҳақида гапирди. Ҳукумат раҳбари фурсатдан фойдаланиб, фуқароларни коронавирусга қарши эмлаш курсидан ўтишга яна бир бор чақирди. Нутқи якунида у ички сиёсат мавзусини кўтарди, бу эса мухолифатнинг норозилигига сабаб бўлди.
Меркель Христиан-демократик ва христиан-социал уюшмаларидан (ХДУ/ХСУ) кўрсатилган номзод Армен Лашетни қўллаб-қувватлади, натижада канцлер депутатларнинг норози бақир-чақирларига жавоб беришга мажбур бўлди.
«Кейинги ҳукумат эгасининг ким бўлиши менга барибир эмас. Бу социал-демократлар бўладими ёки «яшиллари»ми, у сўлларнинг қўллаб-қувватланишини ҳисобга олади ёки ҳеч бўлмаганда воқеаларнинг бундай ривожланишини истисно қилмайди», — деди канцлер.
Сўл партия фракцияси ўтирган томонда норозилик шовқини тингач, Меркель «Мен шунчаки ҳақиқатни айтяпман», — дея таъкидлаб қўйди.
«Ёки ҳукуматда Армин Лашет бошчилигида ХДУ/ХСУ бўлиши мумкин, у бизни келажак томон мўътадил ва марказий позицияларда олиб боради», — дея ўз мавзусида давом этди канцлер. Шундан сўнг у иккинчи бор нутқини бўлди ва янада ҳиссиёт билан таъкидлади: «Мен 30 йилдан буён Бундестаг аъзосиман ва бу каби масалаларни демократиямизнинг марказида бўлмаса, яна қаерда муҳокама қилишни билмайман».
Германияда бўлажак ҳукумат коалицияси социал-демократлар (СДП), «яшиллар» ва сўллардан бири бўлиши мумкин. Меркелнинг ўзи айтиб ўтганидек, шахсан у сўл тарафнинг ҳукуматдаги иштирокига мутлақо қарши. У бошқа партияларни танқид қилиб келади, чунки Меркелнинг фикрига кўра, улар ўз норозилигини очиқ айтмайди. Умуман олганда, СДП ҳам, «яшиллар» ҳам сўл томоннинг бир қатор талабларини қабул қилиб бўлмаслигини айтган. Бу талаблар орасида НАТОдан чиқиш ва барча ҳарбий операцияларда қатнашишни дарҳол тўхтатиш кабилар бор.
Армин Лашет Германиянинг аҳолиси энг кўп Шимолий Рейн-Вестфалия ўлкаси бош вазири. Июль ойининг ўрталарида ўлкада кучли сув тошқини юз берди, ўшандан бери Лашетнинг ва у билан бирга ХДУ/ХСУ сиёсий блокининг рейтинги ўзгарди. Сўровномалар натижаларига кўра, аҳолининг 20 фоизи уларга, 25 фоизи Германия социал-демократик партиясига (СДП) овоз беришга тайёр. Агар ушбу фарқ 26 сентябрдаги сайловгача давом этса, СДП вакили Олаф Шолз Германия канцлери бўлади.
Сайловлар ҳақида
Германияда 26 сентябрь куни парламент сайловлари бўлиб ўтади. Конституцияга кўра, сайловдан кейин 30 кун ичида янги Бундестаг йиғилиши керак. Канцлернинг ваколатлари айнан янги қонун чиқарувчи органларнинг биринчи йиғилишида тугайди, лекин фақат расмий равишда. Лавозимини тарк этаётган канцлер расман вазифасини бажарувчи бўлади, аммо аслини олганда унда барча ваколатлар сақланиб қолади. Бу шуни англатадики, назарий жиҳатдан, Меркель депутатларнинг навбатдаги чақириғида иштирок этиши мумкин.
Янги канцлер президентдан ишонч ёрлиғини олганидан сўнг ўз вазифасини бажаришга киришади. Бу томонларнинг коалиция музокаралари тугагандан сўнг содир бўлади. Тўрт йил олдин бундай музокаралар 172 кун — рекорд даражада узоқ давом этган.
Изоҳ (0)