Ҳиндистоннинг Керала штатида яшовчи 11 кишида ўлимга олиб келувчи Нипаҳ вируси симптомлари топилди, уларнинг аҳволи барқарор. Бу ҳақда штат соғлиқни сақлаш вазири Вина Жоржга таяниб, «Интерфакс» хабар берди.

Ҳиндистон тиббиёт фанлари институти тиббиёт факультети профессори Ашутош Бисваснинг сўзларига кўра, мевахўр кўршапалаклар ушбу вируснинг ташувчиси ҳисобланади. Вирус респираторли симптомлар билан бир қаторда иситма, мушаклар оғриғи, бош оғриғи, бош айланиши ва кўнгил айнишига олиб келиши мумкин.

«Мевахўр кўршапалаклар маълум бир географик ҳудудда яшайди. Агар улар бошқа жойларга учиб ўтса, табиийки, вирус ҳам тарқалиши мумкин. Бизда бу касаллик учун муайян даво йўқ», — деди у. Бисваснинг айтишича, вирус одамдан одамга тез тарқалади.

«Ундан олдин бизда Нипаҳ вируси икки марта авж олган: биринчи сафар Кералада, иккинчи сафар Ғарбий Бенгалияда. Сўнгги эпидемия чоғида касалланган беморларнинг 90 фоизга яқини вафот этганди», — дейди Бисвас.

Унинг қўшимча қилишича, бу муаммо глобал бўлиб, Ҳиндистон яқинидаги бошқа бир қатор мамлакатларда, масалан, Бангладешда вируснинг қайта тарқалиши кузатилган.

Керала ҳукумати бундан олдин Керала штати Кожикод шаҳрида 12 ёшли бола Нипаҳ вирусидан вафот этгани ҳақида хабар берганди. У ерга тиббий гуруҳ юборилган, улар боланинг уйига ташриф буюриб, инфекция манбасини аниқлаш учун яқин атрофдаги рамбутан меваларидан намуналар йиғган.

Эслатиб ўтамиз, 2021 йил январида Жаҳон соғлиқни сақлаш ташкилоти (ЖССТ) 1999 йилда Малайзияда аниқланган Нипаҳ вируси сабабли юзага келиши мумкин бўлган пандемия хавфи ҳақида огоҳлантирган эди.