БМТ Эфиопия аҳолиси очлик ёқасида эканини маълум қилди

Бирлашган Миллатлар Ташкилоти (БМТ)нинг огоҳлантиришича, Эфиопия шимолидаги Тиграй минтақаси сўнгги йиллардаги энг оғир гуманитар инқирозлардан бирини бошдан кечирмоқда.

БМТнинг гуманитар масалаларни мувофиқлаштириш бошқармас маълумотларига кўра, Тиграйда 5,2 миллион одам ёки аҳолининг 90 фоизи зудлик билан гуманитар ёрдамга муҳтож. Улардан 400 минг киши очликдан азият чекмоқда.

Бироқ, бир неча ойдан буён давом этаётган тўқнашувлардан зарар кўрган ҳудудларга 12 июлдан бери зарур буюмлар юкланган юк машиналарининг атиги 10 фоиздан камроғи бора олган. Тиграйдаги барча гуманитар эҳтиёжларни қондириш учун ҳар куни озиқ-овқат, энг зарур буюмлар ва ёқилғи ортилган 100 та юк машинаси келиши керак.

БМТ вакилларининг таъкидлашича, муаммо ресурслар етишмаслигида эмас, балки Тиграйда ҳарбий амалиётлар олиб бораётган ҳукумат кучларининг гуманитар ёрдам билан тўлдирилган кордонларни киритмаётганида. 22 августдан бери мамлакат расмийлари бирорта машинани ўтказишга рухсат бермаган, Тиграйга юкларни Семера-Абала йўлаги бўйлаб Афар тумани орқали етказиб берадиган ягона йўлдан фойдаланишнинг ҳам иложи йўқ.

Тиграйда гуманитар координатор вазифасини бажарувчи Грант Лиэйти ўз баёнотида, халқаро гуманитар ҳуқуққа мувофиқ, «зиддиятнинг барча томонлари яқинлашиб келаётган фалокатнинг олдини олиш учун гуманитар ёрдамнинг тез ва тўсиқсиз ўтишига ёрдам бериши зарурлигини» эслатиб ўтди.

У Эфиопия ҳукуматини гуманитар ходимларнинг мамлакатга тўсиқсиз кириши, шунингдек уларнинг мамлакат ичида эркин ҳаракатланиши, қуруқлик, сув ёки ҳаво орқали керакли товарлар ва ускуналар, нақд пул ва ёқилғи олиб кириши ва ташишига рухсат беришга чақирди.

БМТ вакили, шунингдек, Эфиопия ҳукуматини Тиграйдаги асосий хизматларни, жумладан, электр ва алоқани тиклашга чақирди.

Шу билан бирга, республика ҳукумати минтақани қамалга олганини рад этмоқда. Эфиопия бош вазири матбуот котиби Биллин Сейюм Эфиопия ҳукумати ёрдам машиналарини тўхтатаётгани ҳақидаги даъволарни яна бир бор рад этди. Унинг сўзларига кўра, юк машиналари Тиграйга йўл олмоқда, БМТ томонидан қайд этилган йўл назорат пунктлари сони 7 тадан 3 тага қисқартирилган.

Аввалроқ Эфиопиянинг Оромия ҳудудида содир этилган тўқнашувлар оқибатида камида 210 киши ҳалок бўлгани ҳақида хабар берилганди.