Тожикистон Республикаси президенти Эмомали Раҳмон бугун, 7 сентябрь куни Тожикистон давлат мустақиллигининг 30 йиллиги муносабати билан Душанбеда ўтказилган ҳарбий парадда Тожикистон армияси аскарлари, офицерлари ва захирадаги аскарларни сиёсий ҳушёрликни йўқотмасликка чақирди.
Давлат раҳбари парад иштирокчиларини Тожикистоннинг асосий байрами билан табриклаб, мамлакат аҳолиси республикада конституциявий тузумни тиклаш, тожик заминида тинчлик ва тотувликни таъминлаш учун жонини фидо қилган ўғил-қизларини ҳеч қачон унутмаслигини таъкидлади.
«Бугун минглаб фуқароларимиз ватанга ҳалол ва виждонан хизмат қилаётганидан фахрланамиз ва улар бундан кейин ҳам ушбу вазифани шараф билан адо этишига ишонамиз», — деди президент.
Эмомали Раҳмоннинг қайд этишича, Тожикистон халқи ва ҳукумати миллий армия аскарлари ва офицерлари тимсолида тинчлик, барқарорлик, бирлик ва миллий манфаатлар ҳимоячиларини кўради.
У сўнгги пайтларда террорчилар, экстремистлар, радикаллар, наркогуруҳлар, ноқонуний қурол-яроғ савдоси, кибержиноятлар туфайли юзага келаётган янги муаммолар минтақадаги ва бутун дунёдаги вазиятни ёмонлаштирганини таъкидлади.
Бу борада давлат раҳбари Тожикистон Қуролли кучлари ва ҳуқуқ-тартибот органлари вакилларини сиёсий ҳушёрликни йўқотмасликка, ўз малака ва билимларини доимий ошириб боришга чақирди.
Душанбе гарнизони бўлинмалари ва қўшинларининг ҳарбий парадида 15 мингдан ортиқ тожик аскар ва офицерлари ҳамда 30 минг захирадаги аскарлар қатнашди.
9 сентябрь, Тожикистон Мустақиллиги кунида Душанбедаги «Дўсти» майдонида фуқароларнинг байрам юриши бўлиб ўтади, унда пойтахтнинг 45 мингдан ортиқ аҳолиси иштирок этади.
Аввалроқ Тожикистон президенти «Толибон»га қарши кучларнинг марҳум етакчиларини мукофотлаганди. Хусусан, Эмомали Раҳмон Афғонистон собиқ президенти Бурхониддин Раббонийни ва ҳаётлиги чоғида «Толибон»га қарши курашган дала қўмондони Аҳмадшоҳ Масъудни I даражали Исмоил Сомоний ордени билан мукофотлади.
Изоҳ (0)