Туркияда 6 сентябрдан мамлакат президенти Тоййиб Эрдўғоннинг «Дунё адолатлироқ бўлиши мумкин» номли китоби сотувга чиқарилди. Бу ҳақда «РИА Новости» хабар берди.
Китобда Эрдўғон глобал сиёсат муаммоларига, хусусан, адолатсизлик, миграцион инқироз, халқаро терроризм ва исломофобия, дискриминация ва икки томонлама стандартларга эътибор қаратади.
Туркия президентининг фикрича, БМТ Хавфсизлик кенгаши туб ўзгаришларга муҳтож, у ҳануз «дунё бешта мамлакатдан иборат эмас (БМТ Хавфсизлик кенгашининг доимий аъзолари)» тамойилига асосланган ислоҳотларга чақиришда давом этмоқда.
Эрдўғоннинг сўзларига кўра, «Туркиянинг мақсади — ҳокимиятда бўлганларнинг ҳақ бўлиши эмас, аксинча, ҳақ бўлганларнинг ҳокимиятда бўлишини таъминловчи тизимни ўрнатиш».
Китобда айтилишича, глобал адолат ўрнатишга масъул бўлган институтлар суст ишламоқда. Эски давр талабларига мувофиқ ташкил этилган институтлар ёрдамида замонавий муаммоларни ҳал қилиб бўлмайди, бундан ташқари, бу институтларнинг ўзи янги муаммолар келтириб чиқариши аниқ, таъкидлайди Туркия раҳбари.
«Бизнинг тушунчамизга кўра, айнан адолат дунё бўйлаб тартибни, дунё учун нажот ва бахтиёрликни таъминлайди. Одил дунё учун ишонч ва умидни таъминлайдиган глобал тартиб керак», — деб ёзади у.
Қайд этилишича, китобнинг инглиз, араб, немис, француз, рус ва испан тилларига таржима қилинишидан тушадиган маблағларнинг барчаси Туркия Фавқулодда вазиятлар бошқармасига ўтказилади.
Изоҳ (0)