Сурхондарё вилоятининг Қумқўрғон тумани ЙПХ масканида инспекторнинг тўхташ ишорасига амал қилмай, ҳаракатланишни давом эттирган Damas автомобилини 9-синф ўқувчиси бошқараётгани аниқланди. Бу ҳақда ИИВ ЙҲХББ ахборот хизмати хабар берди.
Маълум қилинишича, автомобиль ҳайдовчиси ЙПХ инспекторининг қонуний талабига бўйсунмай, қарама-қарши йўналишда ҳаракатланишни давом эттирган.
Шеробод туманидаги мактабнинг 9-синф ўқувчиси бўлган йигитнинг сўзларига кўра, у онасининг мазаси йўқлиги учун машинани Шўрчидан бошқариб келаётган бўлган.
Ҳолат бўйича йигит билан тушунтириш ишлари олиб борилган, қоидабузарлик юзасидан маъмурий баённома расмийлаштирилган. Автомобиль жарима майдончасига жойлаштирилган.
Таъкидлаш керакки, Сурхондарёда ҳайдовчилик гувоҳномасисиз автомобиль бошқариш ҳолатлари биринчи бор қайд этилмаяпти. Хусусан, аввалроқ Шерободда ҳайдовчилик гувоҳномаси бўлмаган йигит бошқарувидаги «Жигули» 11 ёшли пиёдани уриб юборгани ва жабрланувчи шифохонада вафот этгани, Бойсунда ҳайдовчилик гувоҳномаси бўлмаган йигит бошқарувидаги Nexia пастликка тушиб кетиши оқибатида 17 ёшли қиз ҳалок бўлгани тўғрисида хабар берилганди.
Изоҳ (0)