Бир неча кун олдин тақдим этилган иккинчи авлод Mercedes-Benz Citan’нинг саёҳатлар учун мўлжалланган версияси пайдо бўлди. Машинани кемперга айлантиришга VanEssa фирмаси томонидан яратилган секцияли мебель ёрдам берган — бу сафар ошхонаси ва икки кишига мўлжалланган ётоқ тизими. Митти «ғилдираклар устидаги уй»нинг премьераси Düsseldorf Caravan Salon кўргазмасида бўлиб ўтган, деб хабар беради Motor.
VanEssa’нинг секцияли модуллари ёрдамида Mercedes-Benz Citan ошхона ва икки кишига мўлжалланган тўлақонли ётоқ жойига эга ихчам кемперга айланади. Ошхона сурилма қутилар тизимига асосланган: бу ерда газ плитаси, 13 литрли сув «баки»га эга ювиш жойи, кичкина музлаткич ва идиш-товоқларни сақлаш учун ғаладонлар мавжуд. Бутун блок оғирлиги 60 килограммга етади ва бир неча дақиқалар ичида ўрнатилади.
Ётоқ жойи ҳам худди шу каби принципга асосланган. Каравот юкхонага жойлаштирилади, зарурат туғилганида бир неча оддий ҳаракатлар билан ёйилади ва олд ўриндиқларга қадар бўлган жойни эгаллайди. Унинг ўлчамлари — 115 га 189 сантиметр.
Düsseldorf Caravan Salon’да яна иккита премьера бўлиб ўтган. Renault компанияси марка каталогида 2022 йилнинг бошида пайдо бўладиган Trafic SpaceNomad кемпервенини, Dembell фирмаси эса Mercedes-Benx Actros базасидаги моторхоумини тақдим этган.
Аввалроқ Volkswagen компанияси Caddy моделининг сафарда керак бўладиган палаткага эга версиясини тайёрлагани, Mercedes-Benz Sprinter модели Maybach’дан ҳам қиммат турувчи автоуйга айлантирилгани тўғрисида хабар берилганди.
Изоҳ (0)